यंदा नो रंगबरसे

चेहऱ्यावर नेहमी मेकअपचा रंग चढवून अभिनयाच्या दुनियेत वावरणाऱ्या कलाकारांना एक दिवस खरे रंग उधळण्याची संधी मिळते ती रंगपंचमीला. चाहतेही त्यांच्यावर बरसरणाऱ्या रंगांची आतुरतेने वाट पाहत असतात. पण यंदा कलाकारांच्या या रंगपंचमीला ब्रेक लागला आहे, याचं कारण आहे शूटिंगचं व्यग्र शेड्यूल. त्यांची होळी यंदा सेटवरच रंगेल.
अनुश्री पवार, कॉलेज क्लब रिपोर्टर
muntainbox@gmail.com
गेल्या अनेक वर्षांपासून साजरी होणारी मराठी कलाकारांची होळी प्रसिद्ध आहे. शिवाजी पार्क, जोगेश्वरीचं बिंबीसार नगर, ठाण्यातल्या कलाकारांची होळी प्रेक्षकांमध्ये चर्चेचा विषय ठरते. यंदा मात्र कलाकार धुळवड साजरी करणार नसल्याचं कळतं. तालमी, शूटिंग्ज यामध्ये कलाकार व्यग्र असल्याने यंदा होळी साजरी होणार नाही.
पुष्कर श्रोत्री याबाबत सांगतो की 'यंदा माझ्या मुलीची दहावीची परीक्षा आहे. मी काही प्लॅन्स केले नाहीत. शिवाय माझ्या नाटकाची तालीमही सुरू आहे. इतर कलाकारही आपापल्या कामात व्यग्र असल्याने आम्ही यंदा धुळवड साजरी होणार नाही.'
गतिमंद मुलांसोबत सेलिब्रेशन
ठाण्यात प्रसिद्ध असलेली विजू माने यांची धुळवड यंदा थोड्या वेगळ्या पद्धतीने साजरी होणार आहे. ठाण्यातल्या एका गतिमंद मुलांच्या शाळेला भेट देऊन तिथल्या मुलांसोबत विजू माने, अभिजीत पानसे, भारत गणेशपुरे, श्रेया बुगडे हे कलाकार हा सण साजरा करणार आहे.
बऱ्याचशा कलाकारांनी यंदा होळीच्या उत्साहापासून लांबच राहायचं ठरवलं आहे. ‘दिल दोस्ती दोबारा’मधले कलाकार अमेय वाघ, स्वानंदी टिकेकर, पूजा ठोंबरे, सखी गोखले या सगळ्यांना रंगपंचमी खेळायला आवडत नाही. त्यांनी मुंटाला सांगितलं की, ‘आम्हाला रंगपंचमी खेळणं अजिबात आवडत नाही आणि यावर्षी शूटमुळे धुलीवंदनाच्याही दिवशी आम्ही सेटवरच असणार आहोत.’ नवोदित अभिनेता अभिनय बेर्डे आणि अनिकेत विश्वासराव यांनीही रंगपंचमी खेळण्याबाबत नापसंतीच व्यक्त केली.
आर्याची होरी
गायिका आर्या आंबेकर होळीनिमित्त एक नवं गाणं लाँच करणार आहे. होरी हा गाण्यातला प्रकार म्हणजे होळीचं वैशिष्ट्य. हा प्रकार खास होळीसाठीच सादर होतो. तो ती संगीतप्रेमींसमोर आणतेय. सोशल मीडियाच्या माध्यमातून हा प्रकार ती घेऊन येणार आहे. आर्याच्या गोड आवाजातली होरी ऐकणं प्रेक्षकांसाठी उत्सुकतेचं असेल.