सुट्ट्यांसाठी मासिक पाळीचा बहाणा नको: ट्विंकल

अभिनेत्री ट्विंकल खन्ना निर्मित 'पॅडमॅन' हा चित्रपट येत्या ९ फेब्रुवारीला प्रदर्शित होत आहे. मासिक पाळीत वापरल्या जाणाऱ्या 'सॅनिटरी पॅड' वर आधारित या चित्रपटाच्या जाहिरातबाजीदरम्यानच ट्विंकलने एक धक्कादायक विधान केलंय, ती म्हणते... ''महिलांनी सुट्ट्यांसाठी मासिक पाळीचा बहाणा करू नये.''

हे विधान जरी महिलाविरोधी वाटत असलं तरी असं म्हणण्यामागचा ट्विंकलचा उद्देश थोडासा वेगळा आहे. त्याचंच स्पष्टीकरण देताना ती म्हणतेय, ''बऱ्याच लोकांना असं वाटत असतं की, महिलांनी महिलांसारखंच राहावं. महिलांना काहीही करण्यापासून रोखणाऱ्या अशा लोकांना आपण मासिक पाळीत सुट्टी घेऊन आपल्याला कमकुवत समजण्याचा आणखी एक बहाणा का म्हणून द्यावा?"

मासिक पाळीच्या वेदना जर असह्य असतील तरच सुट्ट्या घ्या. जशा आपण पोटदुखी किंवा तत्सम आजारासाठी घेतो. अन्यथा आपण महिलांनी मासिक पाळीचा सु्ट्टी घेण्यासाठी म्हणून बहाणा करायला नको., असं म्हणतानाच ट्विंकल एका महिलेचंही उदाहरण देते. ती सांगते, ''मी एका अशा शोचा भाग होते, ज्यात एक महिला सांगत होती, ''मी कमकुवत आहे म्हणून मी घरीच बसायला हवं असे बोल कोणी मला लावू नयेत म्हणून मी मासिक पाळीदरम्यान जास्त काम करते.''

ट्विंकल निर्मित 'पॅडमॅन' हा चित्रपट तिच्याच 'द लेजंड ऑफ लक्ष्मी प्रसाद' या पुस्तकातील एका लघुकथेवर आधारित आहे. या लघुकथेत तिने ज्यांनी कमी खर्चात सॅनिटरी पॅड बनविण्याची मशीन आणून एक नवी क्रांती केली, त्या अरुणाचलम् मुरुगनाथम् यांचा प्रेरणादायी जीवनपट मांडला आहे.