तो 'तिमुर' होता, हा 'तैमुर' आहे: सैफ अली खान

मुंबई मिरर

तैमुर या नावाचा उच्चार, त्याचा होणारा नाद मला आणि करिनाला आवडला. तैमुरचा अर्थ आहे पोलादी. तोही आम्हाला खूप आवडला. या नामसाधर्म्याच्या तुर्की राज्यकर्त्याचा इतिहासही मला माहित आहे. पण तो 'तिमुर' होता. माझा मुलगा 'तैमुर' आहे. तैमुर हे एक पर्शियन नाव आहे... अभिनेता सैफ अली खान त्याच्या मुलाच्या नावावरून उठलेल्या वादंगाबद्दल प्रथमच बोलला.

'मुंबई मिरर'ला दिलेल्या मुलाखतीत त्याने 'तैमुर' नावावरून सोशल मिडीयावर सुरू असलेल्या वादग्रस्त प्रतिक्रियांवर भाष्य केले. 'सोशल मिडियावर व्यक्तीची ओळख बऱ्यापैकी दडवता येते. यामुळे लोक मुक्तपणे त्यांना वाटते ते लिहितात. कधी शब्दांचे भान सुटते. पण ते ठिक आहे. मला वाटते अजूनही आपला देश खूपच संतुलित आहे. मला आणि करिनाला लोकांनी पाठिंबाही दिला. लोक म्हणताहेत की देश उजव्या विचारसरणीकडे झुकत चालला आहे. फॅसिस्ट होतोय, अशी भीती आहे. पण मी याकडे वेगळ्या नजरेने पाहतो. तैमुर नावावरून अनावश्यक वादंग उठला. पण मला जास्त काही सांगण्याची गरज नव्हती कारण विचारीपणे, मुक्तपणे आपली मते मांडणारेही अनेक होते. मला माझ्या मुलाचे नाव ठेवण्याचा अधिकार आहे, म्हणून माझ्या निर्णयाशी सहमती दर्शवणारे होते. त्यामुळे आपला समाज उजवा नाही. भारत अजूनही मुक्त विचारांचा आहे, असे मला वाटते,' असे सैफ म्हणाला.

तो या प्रकाराबद्दल मिश्किलपणे हेही म्हणाला की 'सिनेमा सुरू होण्याआधी डिस्क्लेमर देतात तसा मी द्यायला हवा होता. कोणत्याही व्यक्ती, जिंवत वा मृत, व्यक्तीशी साधर्म्य असल्यास तो निव्वळ योगायोग समजावा.'

सैफ आणि करिना त्यांच्या आयुष्यात आलेल्या नव्या पाहुण्यामुळे खूप समाधाना आहेत. त्यांना त्याचे बारसे तैमुर असे केल्याबद्दल कोणाला, कोणते स्पष्टीकरण देण्याची गरजही वाटत नाही. म्हणूनच टि्वटरवर उठलेल्या वादळाला या नव्या पित्याने शांतपणे तोंड दिलं.

तो म्हणाला, 'तुर्कीश राज्यकर्त्याचे नाव आणि तैमुर या दोन्ही नावांची मुळे समान असतील कदाचित, पण ही सारखी नावे नाहीत. अलेक्झांडर आणि अशोक या नावांशीही हिंसक इतिहास जोडला आहे, याचा अर्थ जे तुमचे नाव आहे त्याचाचसारखे तुम्हाला वागायला हवे असे होत नाही. प्रत्येक मूल त्याचे स्वत:चे प्राक्तन घेऊन येतो. मला आशा आहे की तैमुरदेखील प्रेमाने जग जिंकेल. मी आणि करिनाने दिलेल्या संस्कारांना अंगी बाणवेल. तो माझ्यासारखाच जगाला त्याचा वारसा सांगेल, तोही जगात वाढत असलेल्या इस्लामोफोबियावर मात करेल. माझ्यासारखाच उदारमतवादी, समतोल साधणारा आणि मुक्त विचारांचा असेल.'

'तैमुर नावाच्या एका मुलासोबत मी वाढलो. माझ्या चुलत भावाचे नावही तैमुर आहे. सारा हे नावही माझ्या चुलतबहिणीचे आहे,' असेही सैफने सांगितले.

तो मोठ्याने रडतो आणि पादतो म्हणून माझ्यासारखा!
'तैमुर अधूनमधून हवा सोडत असतो.. मोठ्याने रडत असतो म्हणून तो माझ्यासारखा आहे, असे करिना म्हणते,' असेही सैफने सांगितले.