फोन टू फोन 'क्लिक'
मुंबई टाइम्स टीमसध्या लॉकडाउनच्या काळात अनेक कलाकार, लेखक ऑनलाइन माध्यमांच्या मदतीनं प्रेक्षकांशी संवाद साधत आहेत...
मुंबई टाइम्स टीम
सध्या लॉकडाउनच्या काळात अनेक कलाकार, लेखक ऑनलाइन माध्यमांच्या मदतीनं प्रेक्षकांशी संवाद साधत आहेत. पण, प्रसिद्ध फोटोग्राफर तेजस नेरुरकरची 'फोन टू फोन' फोटोग्राफी सध्या सोशल मीडियावर चर्चेचा विषय बनली आहे. मोठ्या पडद्यावर चित्रपट उभा करण्यामध्ये लेखक आणि दिग्दर्शक महत्त्वाची भूमिका बजावतात. पडद्यामागच्या या कलाकारांच्या वेगवेगळ्या छबी कॅमेऱ्यात टिपण्याचं काम तेजसनं केलं आहे.
व्हिडीओ कॉलिंगच्या माध्यमातून काही कलाकारांचे वेगळ्या मूडमधले ब्लॅक अँड व्हाइट फोटो काढून त्यानं प्रत्येकाच्या फोटोंचं कोलाज केलं. व्हिडीओ कॉलिंगच्या माध्यमातून फोटो काढणं कसं शक्य आहे, असा प्रश्न पडणं साहजिक आहे. तर फोनवरुन मार्गदर्शन करत घरातल्या प्रॉप्सचा वापर करत अप्रतिम फोटो काढण्यात आले आहेत. व्हिडीओ कॉल करुन प्रकाश आणि इतर गोष्टीचं गणित सांभाळून मोठ्या कल्पकतेनं तेजसनं हे फोटो काढले आहेत. आपल्याकडे फारसा माहीत नसलेला हा प्रयोग तेजसनं करुन बघितला आहे.
महेश मांजरेकर, जितेंद्र ठाकरे, अलोक राजवाडे, रवी जाधव, मेघना जाधव, क्षितीज पटवर्धन, आदीनाथ कोठारे, आदित्य सरपोतदार, संजय जाधव, मनवा नाईक, महेश लिमये, हेमंत ढोमे, समीर विद्वांस, विजू माने, प्रवीण तरडे, सतीश राजवाडे, मृणाल कुलकर्णी, वरुण नार्वेकर, केदार शिंदे आणि रणजित गुगले यासारख्या लेखक-दिग्दर्शक मंडळींचे फोटो फोन टू फोन फोटोग्राफी तंत्राचा वापर करुन काढण्यात आले आहेत. तेजसच्या या लॉकडाउन डायरीज फोटो अल्बमची दुसरी सीरिजही लवकरच येणार आहे. त्यामध्ये कोणत्या कलाकारांचा सहभाग असेल हे पाहणं औत्सुक्याचं असेल.
सध्या अनेक जण व्हिडीओ कॉलिंगचा वापर करत आहेत. त्याचा कल्पकतेनं वापर करत कलाकारांचे मूड टिपण्याचा अनोखा प्रयोग करता येऊ शकतो. फोटोंना त्या-त्या कलाकारांना कॅप्शन द्यायला सांगितली. फोन टू फोन फोटोग्राफीचा अनोखा प्रयोग आवडल्याचं अनेकांनी सांगितलं.
- तेजस नेरुरकर