नवोदितांसाठी एक पाऊल पुढे!

विनय राऊळ, कॉलेज क्लब रिपोर्टर

प्रियांकाचा ‘व्हेंटिलेटर’ गाजला. आता आणखी एक मराठी सिनेमा घेऊन ती आली आहे. ‘सध्याच्या काळात इंडस्ट्रीत येणं कठीण झालं आहे. त्यामुळे माझ्या प्रत्येक प्रादेशिक सिनेमात मी नवोदित लेखक, कलाकार यांना संधी देणार आहे’, असं तिनं ‘मटा’शी बोलताना सांगितलं.

मराठी सिनेमांची भुरळ बॉलिवूडलाही पडली असून, प्रियांकासारखे कलाकार मराठी सिनेमाकडे वळले आहेत. तिचा दुसरा मराठी चित्रपट ‘काय रे रास्कला’ नुकताच प्रदर्शित झाला आहे. या निमित्तानं बोलताना तिनं, ‘माझ्या सिनेमांमध्ये मी जास्तीत जास्त नवोदित कलाकारांना संधी देणार आहे. त्यांना संधी उपलब्ध व्हावी यासाठी आम्ही दारं खुली करून देत आहोत. निर्माती म्हणून आपला सिनेमा अधिकाधिक लोकांपर्यंत कसा पोहोचेल यासाठी काही वेगळ्या कल्पनाही राबवत आहोत’, असं सांगितलं.

प्रादेशिक सिनेमा करण्यामागचं नेमकं कारण सांगताना ती म्हणाली, की ‘सध्या आम्ही जास्तीत जास्त प्रादेशिक सिनेमे करण्याचा प्रयत्न करत आहोत. त्यासाठी आमचं अनेक भाषांवर काम सुरू आहे. प्रादेशिक सिनेमा मला जागतिक स्तरावर घेऊन जायचा आहे. प्रादेशिक सिनेमांमधून खूप नवीन कथा समोर येतात. अशी अनेक राज्यं आहेत, जिथे काही ना काही उत्तम कथा मिळेलच.’

सध्या त्यांची टीम आसाममध्ये एक सिनेमा करतेय. मेरी कोमच्या निमित्तानं आसामला गेलेली असताना त्यांच्यासाठी मनोरंजन म्हणून तिनं हे पाऊल उचललं आहे. आपली निर्मिती असलेल्या दुसऱ्या मराठी सिनेमात काम न करण्याबद्दल ती म्हणाली, ‘माझ्या सिनेमात मीच छोटी भूमिका करणं मला पटलं नाही. नवोदितांनाच मला प्रकाशात आणायचं आहे. त्यापेक्षा सिनेमा कोणत्या स्तरावर घेऊन जाता येईल यावर मी लक्ष ठेवून आहे.’ इतका काळ इंडस्ट्रीमध्ये काम केल्यानंतर अजूनही कोणत्याच कामाविषयी संतुष्ट नसल्याचं ती सांगते. प्रियांका सध्या मुंबईत परतली असून, ती मित्र-मैत्रिणींसोबत आणि कुटुंबियांसोबत वाढदिवस साजरा करणार आहे.

...तेव्हा प्रियांका दुखावली!

यावेळी प्रियांकाच्या आई मधू चोप्रा यांनीही मुंटाशी संवाद साधला. प्रियांकाचं कौतुक करताना त्या म्हणाल्या, की ‘आमचं आई-मुलीचं नातं खूप छान आहेच. पण निर्माती प्रियांका ही सतत माझ्या डोक्यावर एखाद्या टांगत्या तलवारीप्रमाणे असते. ती अमेरिकेत असली, तरी इथल्या प्रत्येक गोष्टीवर तिची नजर असते. वादविवाद असोवा कौतुक, ज्या पद्धतीनं ती व्यक्त होते, ते पाहून मी तिच्या बोलण्याचीच चाहती झाली आहे.’ प्रियांका सगळ्या गोष्टींवर बारकाईनं लक्ष ठेवून असते हे सांगताना त्यांची काही उदाहरणंही दिली. तिच्या सिनेमांची जाहिरात, प्रीमिअरसाठी निमंत्रण पत्रिका कशा आहेत, त्यातला मजकूर काय आहे, कोण माणसं कशावर काम करत आहेत, हे सगळं ती विचारत असते.

मध्यंतरी, प्रियांका आणि पंतप्रधान मोदी यांची झालेली भेट तिच्या कपड्यांवरुन वादाच्या भोवऱ्यात सापडली. या देसी गर्लनं टीकाकारांना त्यावर सडेतोड उत्तरही दिलं. या सगळ्याबाबत मधू म्हणाल्या, की 'खरं सांगू, माझी मुलगी अतिशय सुस्वभावी आहे. ती स्वतःहून कधी कुणाला वाईट, वेडंवाकडं बोलणार नाही. ही चर्चा सुरू झाली, तेव्हा ती खूप दुखावली गेली; कारण मोदींसारख्या बड्या व्यक्तिमत्त्वाला भेटल्यावर ते काय बोलले असतील, यापेक्षा तिनं काय ड्रेस घातला यावरच लोकांनी चर्चा केली.'

संकलन - प्रसाद पवार