प्रियांकाला मत मांडण्याचा अधिकार: संयुक्त राष्ट्र

मुंबई: पाकिस्तानच्या मानवाधिकार मंत्री शिरीन मंजारी यांनी बॉलिवूड अभिनेत्री प्रियांका चोप्रा हिला संयुक्त राष्ट्रांची शांतता दूत या पदावरून हटवा अशी मागणी केली होती. यानंतर संयुक्त राष्ट्राकडून प्रियांकाचं समर्थन करण्यात आलं आहे. प्रियांकाला स्वत:चे विचार मांडण्याचा पूर्ण अधिकार आहे, असं संयुक्त राष्ट्राच्या प्रवक्त्यांनी म्हटलं आहे.

संयुक्त राष्ट्राचे महासचिव एंतोनियो गुतारेस यांचे प्रवक्ते स्टीफन डुजारिक यांना प्रियांका चोप्राबद्दल प्रश्न विचारला असता त्यांनी प्रियांकाचं समर्थन केलं. 'जेव्हा संयुक्त राष्ट्रांचे सदिच्छा दूत एखाद्या मुद्यावर वैयक्तिक पातळीवर बोततात तेव्हा त्यांना त्यांचे विचार मांडण्याचा पूर्ण अधिकार असतो', असं त्यांनी स्पष्ट केलं. सदिच्छा दूत जेव्हा वैयक्तिक गोष्टींवर किंवा समस्येवर भाष्य करतात तेव्हा ती त्यांची व्यक्तिगत मते असतात. परंतू जेव्हा संयुक्त राष्ट्राचे सदिच्छा दूत म्हणून एखादी व्यक्ती व्यासपीठावर बोलत असते तेव्हा संयुक्त राष्ट्राच्या विचारसरणीला धरून निपक्षपणे मत मांडणं अपेक्षीत असतं, असं त्यांनी स्पष्ट केलं.

प्रियांका भारतीय लष्कराच्या कृतीचं समर्थन करते. तिनं अण्वस्त्र हल्ल्याच्या धमकीचंही समर्थन केलं होतं. अशी व्यक्ती संयुक्त राष्ट्रांची सदिच्छा दूत या पदावर कशी राहू शकते, असा सवाल करीत पाकिस्तानच्या मानवाधिकार मंत्री शिरीन मंजारी यांनी या पदावरून प्रियंकाला त्वरित हटवा अशी मागणी केली होती.