प्रियांकाचा 'बेवॉच' फक्त प्रौढांना पाहता येणार!

मटा ऑनलाइन वृत्त । मुंबई

बॉलिवूडप्रमाणेच हॉलिवूडमध्येही आपला ठसा उमटवणारी 'देसी गर्ल' प्रियांका चोप्रा 'क्वांटिको' मालिकेनंतर 'बेवॉच' चित्रपटाद्वारे मोठ्या पडद्यावर येण्यास सज्ज झाली आहे. येत्या २ जून रोजी 'बेवॉच' भारतात प्रदर्शित होणार असून प्रियाकांचे चाहते तिला पाहण्यासाठी खूप उत्सुक आहेत. मात्र सेन्सॉर बोर्डाने या चित्रपटाला 'ए' अर्थात अॅडल्ट सर्टिफिकेट दिले असून चित्रपटातील चार दृश्य आणि एका संवादावरही कात्री चालवली आहे. त्यामुळे हा चित्रपट फक्त प्रौढांना पाहता येणार असून अनेकांची निराशा होणार आहे.

'चित्रपटातील बिकीनी शॉट्स कापण्यात काहीच अर्थ नव्हता. बऱ्याच वर्षांपूर्वी 'बेवॉच' मालिका भारतात प्रसारित झाली होती, ज्यात स्लो मोशनमध्ये बिकीनी शॉट्स दाखवण्यात आले होते. तुम्ही गोव्याला बीचवर गेलात तर तिथेही तुम्हाला बिकीनीतील अनेक महिला दिसतील, त्यामुळे चित्रपटातील अशी दृश्ये कापण्यात काहीच अर्थ नव्हता ' असे सेन्सॉर बोर्डाचे अध्यक्ष पहलाज निहलानी म्हणाले. ' मात्र चित्रपटात अनेक अश्लील संवाद आहेत. जिथे अशा संवादांची गरज नव्हती ते आम्ही कापले. पण काही संवाद वगळल्यास चित्रपटाच्या आशयावर फरक पडेल, हे लक्षात ठेवून आम्ही काही संवादांना मंजुरी दिली आहे. त्यामुळेच आम्ही चित्रपटाला ए सर्टिफिकेट दिले आहे' असेही निहलानी यांनी सांगितले.

९०च्या दशकातील 'बेवॉच' मालिकेवर आधारित या चित्रपटात प्रियांका खलनायिकेच्या भूमिकेत दिसणार असून तिच्यासह ड्वेन जॉन्सन आणि झॅक अॅफ्रॉनही महत्वपूर्ण भूमिकेत झळकणार आहेत. मात्र चित्रपट सेन्सॉर बोर्डाच्या कचाट्यात सापडल्याने प्रेक्षकांची निराशा होणार आहे.