अभिव्यक्ती स्वातंत्र्याला धक्का नको!

‘पद्मावती’ला होणाऱ्या विरोधाच्या मुद्द्यावरुन इंडस्ट्री एकवटू लागलीय. अभिनेत्री राधिका आपटेनंही ‘मुंटा’शी बोलताना यावर आपलं रोखठोक मत मांडलं…

'पद्मावती' सिनेमावरुन वातावरण सध्या चांगलंच तापलंय. या सिनेमाला होणारा वाढता विरोध बघता, कलेच्या बाबतीत अभिव्यक्ती स्वातंत्र्यावर कशी गदा आलीय यावर इंडस्ट्रीत एकच चर्चा रंगली आहे. अभिनेत्री राधिका आपटेनंही याबाबत आपलं रोखठोक मत व्यक्त केलं आहे. 'कलेला कलेसारखंच घ्या. ती फार मनाला लावून घेऊ नका. शेवटी सिनेमा हे कलांचं माध्यम आहे. प्रत्येकाला त्याची कला मांडण्याचं अभिव्यक्ती स्वातंत्र्य हे असायलाच हवं', असं ती म्हणते.

एखाद्या सिनेमाला टोकाचा विरोध होण्याचे प्रकार वाढू लागले आहेत. त्यामुळे सिनेमा प्रदर्शित होण्याआधी तो सेन्सॉरऐवजी काही संघटनांना दाखवावा लागतो. स्वयंघोषित संस्कृती रक्षकांमुळे बॉलिवूडवर बाह्यसेन्सॉरशिपचा प्रभाव पडताना दिसतोय. या मुद्द्यावरुन इंडस्ट्रीतली काही मंडळी एकत्र आली आहेत. राधिकानंही त्यांच्या सूरात सूर मिसळत अभिव्यक्तीस्वातंत्र्य असायला हवं असं म्हटलं आहे. ही प्रयोगशील अभिनेत्री एमटीव्ही आणि एचपी इंडियाच्या 'फेम-इस्तान'शोसाठी मेंटर म्हणून लवकरच छोट्या पडद्यावर दिसणार आहे.

राधिकाचा हा नवीन शो चार नवोदित फिल्ममेकर्सना सिनेमा बनवण्याची संधी देणारा आहे. यात भारतीय सिनेसृष्टीतली बडी मंडळी नवख्या लोकांना मार्गदर्शन करताना दिसतील. दर महिन्याला हा मेंटर एक 'डायरेक्टर ऑफ द मंथ'ची ओळख करून देतो. ज्याला दीड महिन्यात त्याचा लघुपट बनवायचा आहे. अभिमन्यू कनोडिया या तरुण फिल्ममेकरला त्याची कलाकृती बनवण्यासाठी राधिका मार्गदर्शन करताना दिसेल. या व्यासपीठाच्या माध्यमातून इंडस्ट्रीला उत्तमोत्तम नवीन टॅलेंट मिळेल, असा विश्वास ती व्यक्त करते.

इंडस्ट्रीला मिळतेय दिशा

डिजिटल मीडियाचा विस्तार जोमानं होत असला तरी इतर माध्यमांना त्याचा धोका नाही असं राधिकाला वाटतं. 'प्रत्येक माध्यमाचं वैशिष्ट्य वेगळं आहे. ते धरून चाललं की कलाकृतीला पसंती मिळते. म्हणजे बॉक्सऑफिसवर १०० कोटी कामावणारा बॉलिवूडपट आणि युट्यूबवर दशलक्ष हिट्स मिळवणारा लघुपट हे दोन्ही एकाचवेळी लोकांना आवडू शकतात. किंबहुना भविष्य हेच आहे. आता इंडस्ट्री मोठी होत चालली असून त्याला दिशा मिळत आहे', असं ती म्हणते.

स्टारडमचा मोह नाही

'टीनएजमध्ये असतानाच मला स्टार बनावं असं वाटायचं. मात्र मोठं झाल्यावर उत्तम काम करून स्वतःची वेगळी ओळख कशी निर्माण करता येईल यावर मी भर दिला. स्टारडमचा मला मोह नाही. त्याची हवा डोक्यात जाऊ देण्यापेक्षा मला स्वतःच्या प्रगतीकडे लक्ष द्यायचंय', असं राधिका सांगते.