रजनीकांतची मुलगी घटस्फोटासाठी न्यायालयात

मटा ऑनलाइन वृत्त । चेन्नई

दक्षिणेतील सुपरस्टार रजनीकांत हे राजकारणात प्रवेश करण्याच्या विचारात असताना कौटुंबिक पातळीवर वेगळ्याच घडामोडी घडत आहेत. रजनीकांत यांची धाकटी मुलगी सौंदर्या हिनं तिच्या पतीपासून वेगळं होण्याचा निर्णय घेतला असून घटस्फोटाची औपचारिकता पूर्ण करण्यासाठी आज ती चेन्नईतील कौटुंबिक न्यायालयात आली होती.

२०१० मध्ये सौंदर्याचा अश्विन रामकुमार या उद्योगपतीशी थाटामाटात विवाह झाला होता. या दोघांना वेद हा दीड वर्षांचा मुलगा आहे. मात्र, दोघांमधील संबंध बिघडल्यानं सौंदर्यानं रामकुमारपासून वेगळं होण्याचा निर्णय घेतला. वर्षभरापूर्वी तिनं न्यायालयात तसा अर्जही केला. रजनीकांत यांना असलेल्या प्रसिद्धीच्या वलयामुळं याविषयी मोठी चर्चाही झाली होती. आज पुढील कार्यवाहीसाठी सौंदर्या न्यायालयात आल्यामुळं पुन्हा एकदा चर्चेला उधाण आलं आहे. सौंदर्या ही ग्राफिक डिझाइनर असून २०१४मध्ये तिनं 'कोच्चडियन' हा अॅनिमेटेड सिनेमा दिग्दर्शित केला होता.