महिलांनो, सनी लिओनीसारख्याच व्हा!

मटा ऑनलाइन वृत्त । मुंबई

दिग्दर्शक रामगोपाल वर्मा यांनी केलेल्या वादग्रस्त टि्वटचे समर्थन करत अभिनेत्री राखी सावंत हिने आता या वादात रामुच्या बाजूने उडी घेतली आहे. रामूने केलेले वक्तव्य योग्य असल्याचे सांगत महिलांनी खरंच सनी लिओनीसारखे व्हावे असा सल्लाही महिलांना देऊन राखी मोकळी झाली आहे!

'राम गोपाल वर्मा यांनी सनी लिओनीचे कौतुक केले आहे. मीदेखील त्यांच्याशी सहमत आहे. सर्व महिलांना मी हे सांगेन की तुम्ही आता स्वयंपाकघर सोडा आणि पुरुषांना रिझवण्याचे कोचिंग घ्या. २०-२० वर्षांचा संसार करून झाल्यावरही एखाद्या पुरुषाला एखादी हॉट बाई मिळाली तर तो बायकोच्या २० वर्षांच्या सेवेला, प्रेमाला एका रात्रीत विसरतो. तर मग महिलांनी आता सनी लिओनीच व्हावे. राम गोपाल वर्मा योग्य बोलत आहेत, त्यांनी माफी मागण्याची आवश्यकता नाही.'

'महिलांनी सनी लिओनीसारखे पुरुषांना समाधान द्यावे' या राम गोपाल वर्मा यांच्या वादग्रस्त टि्वटनंतर वादळ उठले. त्यानंतर वर्मा यांनी पुन्हा असेही टि्वट केले होते की सनी लिओनीकडे इतर कोणत्याही बाईपेक्षा अधिक आत्मसन्मान आणि इमानदारी आहे.