दीपिका आणि रणवीर उद्या करणार साखरपुडा?

विराट आणि अनुष्काच्या लग्नानंतर आणखी एक सेलिब्रिटी जोडी बोहल्यावर चढणार असल्याची चर्चा आहे . बॉलिवूडमधील 'मोस्ट हॅपी गो लकी' कपल दीपिका पादूकोण आणि रणवीर सिंग येत्या पाच जानेवारीला म्हणजेच उद्या साखरपुडा करणार असल्याचं बोललं जात आहे.

रणवीर सिंग एका जाहिरातीच्या चित्रीकरणासाठी नवीन वर्ष सूरु होण्याआधीच श्रीलंकेतील कोलंबो येथे गेला होता. त्यानंतर नवीन वर्षाचं स्वागत करण्यासाठी दीपिकाही कोलंबोला पोहचली. सध्या ते दोघेही कोलंबोत असून दीपिकाचा वाढदिवसही तिथेच साजरा करणार आहेत. दीपिकाच्या वाढदिवसाचा मुहूर्त साधत दोघे साखरपुडा करतील अशी चर्चा सुरू आहे.

काही दिवसांपूर्वी नेहमीच दीपिकासोबत सेल्फी काढणाऱ्या रणवीरनं तिच्या वडिलांसोबतच सेल्फी काढून सोशल मीडियावर पोस्ट केल्यानं सर्वांच्या भुवया उंचावल्या होत्या. तर एका मुलाखतीत प्रकाश पादुकोण दीपिका व रणवीरच्या नात्यावरही बोलले होते.

रणवीर आणि प्रकाश पादुकोण यांच्या सेल्फीमुळे रणवीर-दीपिकाच्या लग्नाच्या चर्चांना मात्र उधाण आले होते. त्यामुळं आता ही जोडी लवकरच लग्नाची बातमी चाहत्यांना सांगणार की 'विरूष्का'सारखा गौप्यस्फोट करणार यासाठी मात्र वाट पाहावी लागणार आहे.