'पद्मावती’ला माझा २००% पाठींबा: रणवीर सिंग

मटा ऑनलाइन वृत्त । मुंबई

'पद्मावती'मध्ये अलाउद्दीन खिलजीची भूमिका साकारणारा अभिनेता रणवीर सिंग यानं विरोधाची पर्वा न करता या चित्रपटाचं जोरदार समर्थन केलं आहे. 'पद्मावती'ला माझा केवळ शंभर टक्के नव्हे तर, २००% पाठिंबा आहे. मी दिग्दर्शक संजय लीला भन्साळी यांच्यासोबत आहे,' असं त्यानं म्हटलं आहे.

'पद्मावती'विरोधात गेल्या काही दिवसांपासून देशभर काहूर माजलं आहे. दीपिका पादुकोण व संजय लीला भन्साळी यांना जीवे मारण्याच्या धमक्या येत आहेत. या चित्रपटातील खिलजीच्या भूमिकेमुळं चर्चेत असलेला सध्याचा आघाडीचा अभिनेता रणवीरनं मात्र यावर अद्याप कुठलंही भाष्य केलं नव्हतं. मात्र, काल त्यानं मौन सोडलं. 'पद्मावती'च्या विरोधकांबद्दल त्यानं कोणतंही वक्तव्य केलं नाही. मात्र, चित्रपटाचं त्यानं पूर्ण समर्थन केलं. 'वाद सुरू असल्यामुळं मी यावर फार काही बोलणार नाही. जो काही निर्णय घ्यायचा, तो निर्माते घेतील, असं त्यानं स्पष्ट केलं.

भन्साळी यांचा ड्रीम प्रोजेक्ट असलेल्या 'पद्मावती’ला सुरुवातीपासूनच विरोधाचा सामना करावा लागत आहे. यात राणी पद्मावती आणि राजपूत संस्कृतीची मांडणी चुकीच्या पद्धतीने करण्यात आली आहे. भन्साळी यांनी चित्रपटात अलाउद्दीन खिलजी आणि राणी पद्मिनीवर काही काल्पनिक प्रसंग चित्रित केले आहेत. हे प्रसंग राणी पद्मिनीचा अपमान करणारे आहेत, असा आरोप होत आहे.