HD सिनेमांसाठी रिलायन्सचा 'बिगफ्लिक्स'

मटा ऑनलाइन वृत्त । मुंबई

रिलायन्स एन्टरटेनमेंटने पहिल्यांदाच एचडी सिनेमाच्या 'बिगफ्लिक्स' हा मुव्ही प्लॅटफॉर्म आणला आहे. बिगफ्लिक्समध्ये नऊ भाषांमध्ये २००० एचडी सिनेमे दाखवण्यात येतील. या अॅप्लिकेशनला भारतासह परदेशातही चांगला प्रतिसाद लाभत आहे.

बिगफ्लिक्सचे तंत्रज्ञान भारतीय आहे. या अॅप्लिकेशनद्वारे सिनेमा-जाहिराती मोफत स्ट्रीम आणि डाऊनलोड करता येणार आहेत. नंतर डाऊनलोड केलेले व्हिडिओ इंटरनेट असणाऱ्या कोणत्याही उपकरणावर पाहता येतील. या तंत्रज्ञानात सिनेमाच्या मध्येच बॅक जाऊनही सिनेमा पाहता येतो. हिंदी, तेलगु, तमीळ, पंजाबी, मल्याळम, गुजराती, मराठी, भोजपुरी आणि बंगाली भाषांमध्ये हे सिनेमे दाखवले जातील.

'डिजीटल एन्टरटेनमेंटचा भारतीय सध्या मोठ्या प्रमाणावर वापर करत आहेत. होम व्हिडिओचं घसरत जाणारं मार्केट बिगफ्लिक्समुळे वधारेल आणि प्रेक्षकांना डिजीटल सिनेमाचा आनंदही घेता येईल,' असे रिलायन्स एन्टरटेनमेंटचे सीओओ शिबाशीष सरकार म्हणाले.