…तर मला अनफॉलो करा!

प्रथमेश राणे, आरएडीएव्ही कॉलेज

मराठीतच लिहिण्या-बोलण्याबाबत काही कलाकार ठाम असतात. अभिनेत्री रेणुका शहाणे यांनी सोशल मीडियावर नुकतंच एका उदाहरणातून हे दाखवून दिलं.

काही मराठी कलाकार मातृभाषेतबाबत ठाम असतात. सुप्रसिद्ध अभिनेत्री रेणुका शहाणे ‌हे त्यापैकीच एक नाव. मराठीसाठी आग्रही असलेल्या रेणुका यांना नुकतंच यावरुन ट्विटरवर एका विचित्र अनुभवाला सामोरं जावं लागलं. मराठीतून ट्विट केल्याबद्दल एका चाहत्याने नाराजी व्यक्त केली होती. त्यावरुन रेणुका यांनी त्याला चांगलीच चपराक लगावली. नंतर त्या चाहत्यानं खजील होऊन स्वतःचं ट्विट डिलिट केलं.

एका चाहत्यानं अलीकडेच रेणुका यांच्या ट्विटर अकाऊंटवर, 'मला मराठी समजत नाही. त्यामुळे मी तुम्हाला अनफॉलो करतोय' अशी कमेंट केली होती. रेणुका शहाणे यांच्या मराठीत केलेल्या ट्विटवर ही कमेंट होती. मातृभाषेबाबत आग्रही असलेल्या रेणुका यांनी मराठी बाणा दाखवत परंतु तितक्याच अदबीने 'मी माझ्या मातृभाषेत ट्विट करत आहे हे न आवडल्यानं तुम्ही अनफॉलो करत असाल तर कृपया लवकर अनफॉलो करा' असा रिप्लाय त्यांनी त्या चाहत्याला दिला. रेणुका यांनी दिलेल्या रोखठोक उत्तरानंतर ‌त्यांच्या इतर चाहत्यांनाही हा प्रकार लक्षात आला.

त्यांच्या या उत्तराला ट्विटरकरांनी जोरदार पाठींबा दिला. 'मातृभाषेबद्दल दाखवलेलं प्रेम हे कौतुकास्पद आहे' असे अनेक रिप्लाय ट्विटरवर दिसत होते. आश्चर्याची गोष्ट म्हणजे अनेक अमराठी चाहत्यांनी 'तुम्ही कुठल्या भाषेत व्यक्त होता यापेक्षा तुम्ही केलेलं काम व तुमचा गोड स्वभाव आम्हाला आवडतो. म्हणून आम्ही तुम्हाला फॉलो करतो’ अशा अर्थाच्या अनेक कमेंट्स केल्या होत्या. रेणुका यांना मिळणारा वाढता पाठींबा बघता तो चाहता मात्र खजील झाला अन् त्यानं स्वतःच स्वतःचं ट्विट डिलिट करून टाकलं.