रणबीर-माहिराच्या 'त्या' फोटोवर ऋषी म्हणाले...

मटा ऑनलाइन वृत्त । मुंबई

बॉलिवूडचा हँडसम हन्क रणबीर कपूर आणि पाकिस्तानी अभिनेत्री माहिरा खान यांचे फोटो काही दिवसांपूर्वी सोशल मीडियावर व्हायरल झाले होते. त्यावरून, त्यांच्यातील नातेसंबंधांबाबत नाना तर्कवितर्क लढवले जात आहेत. काही नेटिझन्सनी या फोटोंबाबत रणबीरचे वडील अभिनेते ऋषी कपूर यांना डिवचलं. तेव्हा, त्यांनी मुलाची पाठराखण करत ट्रोलर्सना सडेतोड उत्तर दिलं.

ट्विटरवर भल्या-भल्यांची शाळा घेण्यासाठी ऋषी कपूर प्रसिद्धच आहेत. त्याच शैलीत त्यांनी ट्रोलर्सचा समाचार घेतला. 'मी ते फोटो बघितले आहेत, त्यात मला काहीही चुकीचं वाटलं नाही. मला माहीत नाही, असं त्या फोटोंमध्ये काहीच नाही. रणबीर तरुण आहे, अविवाहित आहे. तो कोणालाही भेटू शकतो. आता जर लोक त्याच्या खासगी आयुष्यात डोकावत असतील तर ते चुकीचं आहे. मला या बाबतीत काहीही बोलायचं नाही, असं त्यांनी निक्षून सांगितलं.

माहिरा शाहरुख खानच्या 'रईस' चित्रपटातून बॉलिवूड पडद्यावर दिसली होती. पाकिस्तानी कलाकारांना विरोध करणाऱ्या महाराष्ट्र नवनिर्माण सेनेनं तिच्या भूमिकेवरही आक्षेप घेतला होता. त्यामुळे ती चांगलीच चर्चेत आली होती.