​ कंगना-हृतिक वादात रोहित रॉयची उडी

मटा ऑनलाइन वृत्त | मुंबई

कंगना-हृतिक वादात फरहान अख्तर, यामी गौतम, सोनम कपूर, शबाना आझमी आणि ट्विंकल खन्ना यांच्यानंतर अभिनेता रोहित रॉय यानंही हृतिक रोशनला पाठिंबा दर्शवला आहे. 'आपल्याकडं महिलांना देवीचं स्थान दिलं जातं. याचा अर्थ स्त्री म्हणेल ते सगळं बरोबरच आहे असा होत नाही,' अशा शब्दांत रोहित रॉयनं नाव न घेता कंगनावर टीकेची झोड उठवली आहे.

हृतिक व कंगनामधील वाद दिवसेंदिवस चिघळत चालला आहे. दोन्हीकडून आरोप-प्रत्यारोपांच्या फैरी सुरू असताना बॉलिवूडनंही या वादात उडी घतेली आहे. सध्यातरी हृतिकला वाढता पाठिंबा मिळताना दिसत आहे. रोहित रॉयनं सोशल मीडियावर पोस्ट टाकून या वादात हृतिकच्या बाजूनं बॅटिंग केली आहे. 'माझा चांगला मित्र आणि एका महिला सहकलाकारामध्ये सुरू असलेला वाद वेदनादायी आहे. मी कोणाची बाजू घेण्याचा प्रश्न नाही. पण सध्या जे काही सुरू आहे, त्याचा संताप आल्यामुळं मी माझं मत मांडतोय. 'माझ्या मदतीची त्यांना गरज नाही हे माहीत आहे. पण तरीही त्यांना मदत करायला मला आवडेल,' असं त्यानं म्हटलंय.

'केवळ स्त्री आहे म्हणून एखाद्या व्यक्ती बरोबर आहे असं होत नाही. सोशल मीडियावर लोक लगेच निर्णय देऊन मोकळे होतात. मात्र, त्यांना हृतिक आणि कंगनामधील नात्याबद्दल किती माहिती आहे? हृतिकला मी चांगला ओळखतो. त्याला विनाकारण बदनाम केलं जातंय. त्यानं स्वत:च्या सन्मानासाठी लढण्याचा निर्णय घेतला आहे. एखादा संवदेशनशील माणूसच हे पाऊल उचलू शकतो,' असं रोहितनं म्हटलंय. हा वाद लवकर मिटायला हवा अशी अपेक्षाही त्यानं व्यक्त केलीय.