ग्लॅमरस सई

मराठी आणि हिंदी चित्रपटसृष्टीत आपलं नाव कमवलेली ग्लॅमरस अभिनेत्री सई ताम्हणकरचा आज वाढदिवस आहे. या निमित्तानं अभिनेत्री प्रिया बापटनं तिच्याविषयी काही गोष्टी मुंटासोबत शेअर केल्या.


सई आणि तुझी मैत्री कशी झाली?

आम्ही टाइमपास चित्रपटामध्ये एकत्र काम केलं होतं. पण त्यात आमचा एकत्र एकच सीन होता. त्यानंतर आम्ही वजनदार चित्रपटात काम केलं. त्यावेळी शूटिंगदरम्यान आमची गट्टी जमली.

कोणालाच माहिती नसलेली अशी तिची एखादी गोष्ट कोणती?

ती फार चविष्ट केक बनवते.

भेटल्यावर कोणत्या विषयावर गप्पा रंगतात?

आम्ही फिटनेस आणि कामाबद्दल चर्चा करतो. मला कामाबद्दल अनेक प्रश्न पडतात, जे मी तिला हक्कानं विचारते.

सई ऑफ द कॅमेरा कशी आहे?

प्रत्येक गोष्टीत ती खूप सहकार्य करते. जितकी ती ग्लॅमरस दिसते तशी ती मनाने अत्यंत साधी आहे. आपण इथवर कसे पोहोचलो, भविष्यात काय केलं पाहिजे, या सगळ्याचा विचार करून ती एखादी कृती करते.

तिचा चिट डे कसा असतो?

खरं तर चिट डेला तिला मांसाहारी पदार्थ खायला खूप आवडतं.

तिच्या तोंडी नेहमी असलेला एखादा डायलॉग कोणता?

'सवाल' आणि काही आवडलं की आपण 'वाव' असं म्हणतो पण ती 'वुव' अशा तिच्या शैलीत बोलते.

सई आणि फॅशन याचं वर्णन कसं करशील?

ती ग्लॅमरस अभिनेत्री आहे. ती कोणत्याही पद्धतीची फॅशन करू शकते आणि तिच्यावर ते अगदी छान दिसतं. आपल्याकडे फार कमी लोकांना फॅशन सेन्स आहे, त्यातली एक सई आहे.

सईच्या वाढदिवसानिमित्त तिला काय सांगावंसं वाटतं?

माझं एकच म्हणणं आहे की, 'मला वरचे वर भेटत राहा'.

तिला भेट द्यायची झाली तर काय देशील?

तिला मी वर्कआउटसाठी लागणारा स्विस बॉल भेट म्हणून देईन. गेल्यावर्षीपासून ती फिटनेसकडे जास्त लक्ष देतेय. त्यामुळे ती कुठेही शूटिंगला गेली तर तिला वर्कआऊट करता येईल, या दृष्टीनं स्विस बॉल देईन.

शब्दांकन- विनय राऊळ