'सैराट'मधील 'त्या' झाडाची फांदी तुटली

मटा ऑनलाइन वृत्त । सोलापूर

'सैराट' या चित्रपटाच्या 'झिंगाट' यशामुळे दिग्दर्शक नागराज मंजुळे, रिंकू राजगुरू (आर्ची), आकाश ठोसर (परश्या) यांच्यासह अनेकांचं नशीब पालटलं. सोलापूरमधील करमाळ्याला - जिथे या सिनेमाचं शूटिंग झालं त्या गावालाही 'अच्छे दिन' आले. त्यासोबतच, ती विहीर, ते झाडही भलतंच 'फेमस' झालं. प्रेमवेड्यांचा 'सेल्फी पॉइंट' होऊन गेलं. कित्येक जोडप्यांनी तिथे जाऊन प्रेमाच्या आणाभाका घेतल्या. 'मराठीत सांगितलेलं समजत नाय... इंग्लिशमध्ये सांगू?' असं म्हणत एकमेकांना 'प्रपोज' केलं. या अशा 'सैराट' चाहत्यांसाठी एक वाईट बातमी आहे. 'सैराट झालं जीss' या गाण्यात दिसलेल्या निष्पर्ण झाडाची फांदी तुटली आहे. सैराटनंतर अनेक 'आर्चीं'नी या फांदीवर बसून फोटो सेशन केल्यामुळेच ही फांदी तुटल्याचं समजतं.

मराठी चित्रपटसृष्टीत सैराट या चित्रपटानं अनेक विक्रम रचले. १०० कोटींचा गल्ला जमवणारा तो पहिलाच मराठी चित्रपट ठरला. कित्येकांनी या चित्रपटाची पारायणंच केली. त्यातील अगदी छोट्या-छोट्या गोष्टीही सिनेप्रेमींच्या मनावर कायमच्या कोरल्या गेल्यात. त्यामुळेच 'सैराट'मधील विहीर दुष्काळात कोरडी पडल्याचं पाहून अनेकजण हळहळले होते. आता पुन्हा तसंच दुःख 'सैराट'लेल्यांना झालंय.

आर्ची-परश्याच्या प्रेमाचं साक्षीदार ठरलेल्या, करमाळ्यातील निष्पर्ण झाडाची फांदी तुटल्याचं वृत्त सोलापुरात वाऱ्याच्या वेगानं पसरलंय. सोशल मीडियावरून ही बातमी सगळ्यांच्याच मोबाइलवर झळकलीय. आश्चर्याची गोष्ट म्हणजे, त्यावर अनेकांनी रडके इमोजी टाकून आपल्या भावना व्यक्त केल्यात. त्यातून, आजच्या जमान्यात काहीही होऊ शकतं, हेच पुन्हा सिद्ध झालंय.