'त्या' भीतीनं जीवघेणे स्टंट करत होतो: अमिताभ

मटा ऑनलाइन वृत्त । मुंबई

'दोस्ताना', 'बॉम्बे टु गोवा', 'नसीब', 'काला पत्थर' आणि 'शान' या चित्रपटांत अमिताभ बच्चन आणि शत्रुघ्न सिन्हा यांच्या अभिनयाची जुगलबंदी पाहायला मिळाली होती. आता पुन्हा २५ वर्षांनी एका कार्यक्रमात त्यांची ही जुगलबंदी पाहायला मिळणार आहे. त्यानिमित्त दिलेल्या मुलाखतीत त्यांनी आपल्याला चित्रपटांमध्ये जीवघेणे स्टंट का करावे लागत होते, याचं कारण सांगितलं आहे.

झी टीव्हीवरील 'यारों की बारात'च्या पहिल्या भागात भारतीय सिनेमातील या दोन महानायकांना एकत्र आणण्यात आलं आहे. या नवीन कार्यक्रमात दिग्दर्शक साजिद खान आणि अभिनेता रितेश देशमुख त्यांची मुलाखत घेणार आहेत. त्यात अमिताभ आणि शत्रुघ्न सिन्हा आपल्या चार दशकांच्या मैत्रीच्या आठवणी आणि मनाचे ठाव घेणारे किस्से प्रेक्षकांना सांगणार आहेत. सूत्रांच्या माहितीनुसार, पूर्वीच्या चित्रपटांमध्ये जीवघेणे स्टंट का करावे लागत होते, याची कारणे त्यांनी सांगितली आहेत. पूर्वी तंत्रज्ञानाअभावी स्टंट स्वतःच करावे लागत होते. एखाद्या अॅक्शन सीनमध्ये डोंगर, इमारतीवरून उडी मारावी लागत होती आणि प्रेक्षकांना खूश करावं लागत होतं. त्यावेळी स्टंटमॅन, बॉडी डबल्स अशी काही कॉन्सेप्टच नव्हती. आपल्याच पद्धतीनं चित्रपटातल्या गुंडांशी दोन हात करावे लागत होते. हे सीन करताना सुरक्षाही पूर्णपणे पुरविली जात नव्हती. अनेकदा समोरच्या व्यक्तीला ठोसा मारल्यास तो जखमी व्हायचा, असं या दोघांनी सांगितलं.

हे जीवघेणे स्टंट करण्यास तुम्ही नकार का देत नव्हते, असा प्रश्न साजिदनं विचारल्यानंतर अमिताभनं दिलेलं उत्तर चक्रावून टाकणारं होतं. आम्ही स्टंट करण्यास नकार देऊ शकत नव्हतो. कारण चित्रपटातून काढून टाकण्याची भीती आम्हाला वाटत होती. त्यामुळं हे स्टंट आम्हाला करावेच लागत होते, असं अमिताभ यांनी सांगितलं.