Lagira Zhala Jee: लागिरं.. मालिकेतील कलाकारांच्या नावानं फसवणूक

सांगली

गर्दी जमवण्यासाठी चित्रपट किंवा टीव्ही मालिकांतील कलाकारांना आणण्याकडं आयोजकांचा कल असतो. त्यासाठी आयोजक वाट्टेल तितके पैसे मोजले जातात. सांगलीत अशाच एका आयोजकाची कलाकारांच्या नावानं फसवूणक झाली आहे. झी मराठीवरील 'लागिरं झालं जी' या मालिकेतील कलाकारांना कार्यक्रमासाठी घेऊन येतो असे सांगून एका भामट्याने आयोजकांकडून ५० हजार रुपये उकळल्याची घटना समोर आली आहे.

सत्यापा मोरे असे या भामट्याचे नाव आहे. वाळवा तालुक्यातील माळभागाच्या शिवाजी व्यायाम मंडळाने शहीद जवानांच्या स्मरणार्थ हिंदी गीतांच्या 'जागो हिंदुस्तानी' नावाच्या कार्यक्रमाचे आयोजन केले होते. श्रीकांत गणगटे हे या कार्यक्रमाचे मुख्य आयोजक होते. गणगटे यांची सत्यापा मोरेशी ओळख झाली. मला ५० हजार रुपये दिले तर मी 'लागिरं झालं जी' मालिकेतील कलाकार धोंडीबा कारंडे, किरण राणे, निखिल चव्हाण, संदीप जंगम या सर्वांना आणतो, अशी थाप मारली. श्रीकांत गणगटे यांना हे खरे वाटले. त्यांनी त्याला ५० हजार रुपये दिले. कार्यक्रम पत्रिकेवर सर्व कलाकाराचे फोटो छापले व सोशल मीडियावर ही पत्रिका शेअर केली. कार्यक्रमासाठी १००, २०० आणि ३०० रुपये तिकीट दर ठेवण्यात आले.

या कार्यक्रमासंदर्भात कोणतीही कल्पना या कलाकारांना नव्हती. सोशल मीडियावर पत्रिका पाहिल्यानंतर ही बाब कलाकारांच्या लक्षात आली. या प्रकरणी अभिनेता आणि दिग्दर्शक धोडिंबा कारंडे यांनी सर्व कलाकारांच्या वतीने शाहूपुरी पोलीस ठाण्यात तक्रार दाखल केली होती. परंतु, आयोजकांनी चूक मान्य करून फसवणूक झाल्याचे सांगितल्यावर गणगटे यांनी तक्रार मागे घेतली आहे.