कायमचं निर्भय दे...

आजच्या बालदिनानिमित्त अभिनेता संकर्षण कऱ्हाडेनं ‘मुंटा’च्या माध्यमातून छोट्या दोस्तांना दिलेली ही छानशी कवितेची भेट…

'सेटल'च्या या भूतापासून, कायमचं निर्भय दे...

नाहीतर मला माझं माझं, ते बालपणीचं वय दे...

हो हो हे तेच वय, जेव्हा शक्तीमान लागायचं...

माझी झोप जेवण सगळं, आई-बाबांनी बघायचं...

एकदा मला लहान कर, त्या पेरुच्या झाडावर चढू दे...

अर्जुनाची गोष्ट ऐकत, आजोबांजवळ पडू दे...

लहान तर कर, मी वाढलेलं सगळं सगळं खाईन...

मित्राकडे जाईन अभ्यासाला, आणि अभ्यासच करुन येईन...

मला नव्हतं वाटलं देवा, तू असा खेळ करशील...

वाढत्या वयाच्या आकाराची, संकटंसुद्धा भरशील...

मोठं करतो तो आम्हाला, अन् खेळ पहात बसतो...

खरे 'सेटल' आपण आपल्या, लहानपणी असतो!