बी-टाउनमध्ये छोटे मियाँ

बॉलिवूडसाठी प्रत्येक वर्ष काही ना काही नवीन घेऊन येतं. कधी सारख्या विषयावरच्या एकाहून अधिक सिनेमांचं प्रदर्शन असतं, कधी अॅक्शनमधले प्रयोग, कधी फॅशनची चर्चा, कधी मल्टिस्टारचा ट्रेंड, तर कधी आर्थिक गुंतवणुकीचे रेकॉर्ड तोडणारी बातमी असते. यंदाचं वर्षं हे नवीन चेहऱ्यांसाठी ‘लाँचिंग इयर’ ठरणार आहे. हे चेहरे इंडस्ट्रीतील प्रस्थापित कलाकारांच्या कुटुंबातील असून, यात भाऊ-बहीण, मुलगी-मुलगा लाँच करण्याचं प्रमाण जास्त आहे.
बॉलिवूडला घराणेशाही नवीन नाही. एकाच मोठ्या सिने-कुटुंबाच्या पिढीतले पुढचे चेहरे सिनेमात चमकण्यासाठी नेहमी तयार असतात. कुणी स्क्रीनवर झळकतं, तर कुणी सुरुवातीला ऑफ स्क्रीन काम करून फिल्मी करिअरला सुरुवात करतं. यंदाच्या वर्षात कपूर, खान, सिन्हा कुटुंबातील नवे चेहरे मोठ्या बॅनरच्या माध्यमातून लाँच करण्यात येणार आहेत. आपलं लाँचिंग दणक्यात व्हावं, यासाठी या कलाकारांनी शारीरिक मेहनतीसह दिसण्यावरही मेहनत घेणं आधीच सुरू केलंय.
यावर्षी लाँच होणारा मोठा चेहरा म्हणजे जान्हवी कपूर. प्रसिद्ध निर्माता आणि दिग्दर्शक करण जोहर जान्हवीला लाँच करणार असल्याची पक्की खबर ‘पापा’ बोनी कपूर यांनी दिली आहे. करण तिला नेमक्या कोणत्या सिनेमातून समोर आणणार, याविषयी मात्र माहिती नाही. करण यावर्षी ‘सैराट’चा रिमेक आणि ‘स्टुडंट ऑफ द इयर’च्या सीक्वेलवर काम करत असून, यापैकी कोणत्या तरी एका सिनेमात तो जान्हवीला भूमिका देणार असल्याची चर्चा आहे. यानंतर सैफ अली खान आणि अमृता सिंग यांची मुलगी सारा खानही बॉलिवूडमध्ये येण्याच्या तयारीत आहे. तिलाही करण जोहरच लाँच करणार असून, वरीलपैकी कोणता सिनेमा तिच्या पदरात पडतोय हे लवकरच कळेल.
श्रद्धा कपूरचा भाऊ सिद्धांत ‘हसीना’ या सिनेमात तिच्याचसह चमकणार आहे. हसीना पारकरच्या आयुष्यावर आधारित या सिनेमात सिद्धांत दाउद इब्राहिमची भूमिका करतोय. शाहिद कपूरचा भाऊ ईशान खट्टर दीपिका पदुकोणसोबत झळकणार असून, प्रसिद्ध इराणी दिग्दर्शक माजिद मजिदीच्या सिनेमाचं मोठं व्यासपीठ त्याला मिळणार आहे. ‘सैराट’च्या हिंदी रिमेकमध्ये ईशान झळकणार अशीही मध्यंतरी चर्चा होती.
सोनाक्षी सिन्हाच्या जुळ्या भावांपैकी लव सिन्हानं एकता कपूरचा सिनेमा ‘साइन’ केल्याचं समजतं. अनेक नव्या चेहऱ्यांना बॉलिवूडमध्ये आणलेल्या सलमान खाननं आता मेव्हण्याला म्हणजे बहीण अर्पिताच्या नवऱ्यालाच लाँच करायचं ठरवलंय. सलमानचीच निर्मिती असलेल्या सिनेमातून आयुषला लाँच करण्यात येईल. सैफ अली खानची मुलगी साराही या सिनेमात दिसण्याची शक्यता आहे. सध्या आयुष सिनेमाच्या तयारीला लागला असून, त्यानं अभिनेता वरुण धवनकडून फिटनेसचे धडे घ्यायला सुरुवात केली आहे. दिग्दर्शक निखिल अडवाणी विनोद मेहराचा मुलगा, रोहन मेहराला ‘बझारा’ या सिनेमातून लाँच करतोय. यात रोहन सैफ अली खानसोबत दिसेल. येत्या सहा महिन्यात या नावांमध्ये आणखी भर पडेल.