मी देश सोडण्याच्या चर्चा अफवाः शबाना आझमी

नवी दिल्लीः

मी देश सोडणार असल्याच्या चर्चा या निव्वळ अफवा असल्याचं स्पष्टीकरण ज्येष्ठ अभिनेत्री शबाना आझमी यांनी दिलं आहे. पंतप्रधान नरेंद्र मोदी पुन्हा पंतप्रधान झाल्यास शबाना आझमी देश सोडतील, अशा चर्चा काही दिवसांपासून रंगल्या होत्या. त्यावर शबाना आझमी यांनी ट्विटरच्या माध्यमातून स्पष्टीकरण देत 'फेक न्यूज ब्रिगेड'वर टीका केली.

मी देश सोडणार असल्याच्या चर्चांमध्ये तथ्य नाही. पंतप्रधान नरेंद्र मोदी पुन्हा पंतप्रधानपदी विराजमान झाल्यास देश सोडण्याचे वक्तव्य मी कधीही केलेलं नाही. याच देशात माझा जन्म झाला असून, येथेच माझा मृत्यू होईल, असं ट्विट शबाना आझमी यांनी केलं आहे.

फेक न्यूज ब्रिगेडची परिस्थिती दयनीय आहे. एखाद्या मुद्यावर चर्चा न करता, अशी खोटी बनावट माहिती पसवण्याचा उद्योग यांनी पुन्हा सुरू केलाय आणि देशातील जनताही अशा माहितीवर विश्वास ठेवते, असंही त्यांनी पुढे म्हटलंय. माझ्या वडिलांनी विरोधकांना शत्रूप्रमाणे वागणूक देण्याची शिकवण मला दिलेली नाही, असं त्या पुढे म्हणाल्या.