शाहरूखला भीती कशाची?

आपल्या आवडत्या कलाकाराच्या वैयक्तिक गोष्टी जाणून घेण्यात प्रत्येक चाहत्याला रस असतो. अगदी त्याच्या आवडत्या परफ्युमपासून त्याला नेमकी कशाची भीती वाटते किंवा आजच्या भाषेत सांगायचं झाल्यास, कशाचा फोबिया वाटतो हे जाणून घेण्यातही त्यांना रस असतो.

शाहरूख खाननं आपल्या चाहत्यांसाठी असाच एक महत्त्वाचा तपशील नुकताच जाहीर केला. ‘टेड टॉक्स’ या नव्या टीव्ही शोमध्ये शाहरूखनं आपल्याला आर्टिफिशियल इंटेलिजन्स अर्थात कृत्रिम बुद्धिमत्तेची भीती वाटत असल्याचं सांगितलं.

कृत्रिम बुद्धिमत्ता हे तंत्रज्ञान क्रांतिकारी ठरत असलं, तरी त्यामुळे मानवी नात्यांवर तीव्र परिणाम होईल, अशी भीती शाहरूखला वाटते. जगभरासह बॉलिवूडही या नव्या तंत्रज्ञानाला आपलंसं करत असलं, तरी त्यामुळे भविष्यात माणूस एकाकी आणि आळशी होईल, असं किंग खानला वाटतं. गुगल कंपनीचे मुख्य कार्यकारी अधिकारी सुंदर पिचाई यांचा समावेश असलेल्या या एपिसोडनं शाहरूखची ही भीती प्रेक्षकांपर्यंत पोहोचवली. याच एपिसोडमध्ये सहभागी झालेल्या वक्त्यांपैकी एक अनब जैननं असं उपकरण तयार केलं आहे, जे भविष्यात पृथ्वीवर वायूची परिस्थिती कशी असेल, याचं भाकीत वर्तवून त्याचं विश्लेषण करतं. या उपकरणाची माहिती घेतल्यानंतर भविष्याची झलक पाहून शाहरूख चांगलाच अस्वस्थ झाला होता.