'शोले', 'दीवार' अजून पाहिलेला नाही: शत्रुघ्न सिन्हा

मटा ऑनलाइन वृत्त । मुंबई

हिंदी चित्रपटांच्या इतिहासात मैलाचा दगड ठरलेले व अमिताभ बच्चन या अभिनेत्याला यशोशिखरावर पोहोचविणारे 'शोले' व 'दीवार' हे चित्रपट न पाहणारा रसिक विरळाच! पण असा एक रसिक खुद्द बॉलिवूडमध्येच आहे. तो म्हणजे अमिताभ यांच्यासोबत काही चित्रपटात सहकलाकार म्हणून काम करणारे अभिनेते शत्रुघ्न सिन्हा!

विश्वास बसत नाही ना! पण हे खरं आहे. खुद्द सिन्हा यांनीच हा गौप्यस्फोट केला आहे. 'शोले' आणि 'दीवार' हे दोन चित्रपट मी आजतगायत पाहिले नसल्याचं सिन्हा यांनी म्हटलं आहे. त्यासाठी त्यांनी दिलेलं कारणही तितकंच अजब आहे. 'शोले' आणि 'दीवार' या चित्रपटांची ऑफर अमिताभ यांच्या आधी मला आली होती. मात्र, मी त्या ऑफर नाकारल्या. माझ्या नकारानंतर हे चित्रपट अमिताभ बच्चन यांनी केले आणि तिथूनच त्यांची महानायक म्हणून वाटचाल सुरू झाली. हे चित्रपट नाकारणं ही माझी चूकच होती. त्याची खंत आजही वाटते. त्या चुकीचं प्रायश्चित्त म्हणूनच अजूनही मी हे चित्रपट पाहिले नाहीत,' असं त्यांनी एका कार्यक्रमात सांगितलं.

शत्रुघ्न सिन्हा यांनी बॉलिवूडमध्ये खलनायक म्हणून आपली ओळख बनवली. त्याबद्दल ते म्हणाले, 'मी खलनायकाच्या भूमिका वेगळ्या पद्धतीनं केल्या. मी पहिलाच असा खलनायक होतो की, ज्याच्या एन्ट्रीला टाळ्यांचा कडकडाट व्हायचा. विदेशी वृत्तपत्रांमध्येही तसं छापून आलं होतं. आजवर अनेक चांगले खलनायक झाले. पण त्यापैकी कुणाचंही टाळ्यांनी स्वागत झालं नाही. याच टाळ्या मला पुढं दिग्दर्शक आणि निर्मात्यांपर्यत घेऊन गेल्या.'