... म्हणून ढिंच्याक पूजाचे व्हिडीओ यूट्युबवरून हटवले

मटा ऑनलाइन वृत्त । मुंबई

‘सेल्फी मैने लेली आज’ गाणारी ढिंच्याक पूजा अनेक दिवसांपासून चर्चेचा विषय ठरत आहे. सध्या ही ढिंच्याक पूजा तीच्या नवीन गाण्यामुळं नाही तर वेगळ्याच कारणासाठी चर्चेत आहे. कारण ढिंच्याक पूजाचे व्हिडिओ कॉपीराईटच्या तक्रारीमुळं यूट्युबवरून हटवण्यात आले आहेत.

यूट्युबवर एक लाखांपेक्षा जास्त सबस्क्राईबर्स असताना ढिंच्याक पूजाचे १२ व्हिडीओ यूट्युबवरून हटवण्यात आले आहेत. कथप्पा सिंग या व्यक्तीच्या विनंतीवरून यूट्युबने ढिंच्याक पूजाचे व्हिडीओ हटवले आहेत. यूट्यूबच्या पॉलिसीनुसार जर तुमच्या परवानगीशिवाय तुम्ही एखाद्या व्हिडिओमध्ये दिसत असाल तर तो व्हिडिओ काढून टाकण्याची विनंती तुम्ही यूट्युबला करू शकता. यूट्युबच्या याच पॉलिसीमुळं कथप्पाने ढिंच्याक पूजाचे व्हिडीओ हटवण्याची तक्रार केल्याची चर्चा आहे.

काही दिवसांपूर्वीच ढिंच्याक पूजाचं ‘दिलो का शूटर’ हे गाणं आलं होतं. सोशल मीडियावर हे गाणं व्हारयल झाल्यानंतर दिल्ली पोलिसांनी वाहतुकीचे नियम मोडल्याबद्दल तिच्यावर कारवाई केली होती. ढिंच्याक पूजाचे व्हिडीओ यूट्युबवरून हटवण्यात आल्यानं तिच्या गाण्यावर वैतागणाऱ्यांसाठी ही एक आनंदवार्ता असली तरी तिच्या चाहत्यांचा मात्र हिरमोड झाला आहे.