'पद्मावती' चित्रपटाला हार्दिक पटेलचा विरोध

मटा ऑनलाइन वृत्त । उदयपूर

निर्माता आणि दिग्दर्शक संजय लीला भन्साळी यांचा आगामी 'पद्मावती' चित्रपट चित्रीकरण सुरू होण्याआधीच वादाच्या भोवऱ्यात सापडला आहे. दीपिका पदुकोण, शाहिद कपूर आणि रणवीर सिंह यांच्या प्रमुख भूमिका असलेल्या या चित्रपटाला गुजरातमधील पटेल-पाटीदार आंदोलनाचा नेता हार्दिक पटेलने विरोध केला आहे.

चित्तौडचे राजे रतनसेन यांची पत्नी पद्मिनी (पद्मावती) हिच्या जीवनावर हा चित्रपट बेतलेला आहे. पद्मावतीची भूमिका दीपिका, रतनसेनची भूमिका शाहिद तर अलाउद्दीन खिलजीची भूमिका रणवीर साकारत आहे. या चित्रपटाचे शुटिंग लवकरच सुरू करण्यात येणार असतानाच गुजरात आणि राजस्थानमधून विरोधाचा सूर निघू लागला आहे. राजस्थानमध्ये राजपूत करणी सेना तर गुजरातमध्ये हार्दिक पटेलच्या नेतृत्वाखालील पाटीदार नवनिर्माण सेनेने या चित्रपटाच्या चित्रीकरणाला तीव्र विरोध केला आहे.

हार्दिकने संजय लीला भन्साळी यांना पत्र लिहून इतिहासाची तोडमोड केल्यास खपवून घेतले जाणार नाही, असा इशाराच दिला आहे. याबाबत ठोस आश्वासन मिळत नाही तोपर्यंत गुजरातमध्ये चित्रीकरण होऊ दिले जाणार नाही, असेही पत्रात नमूद करण्यात आले आहे. लोकांच्या विरोधानंतरही हा चित्रपट बनवण्यात आला आणि त्यात इतिहासाशी छेडछाड केल्याचे लक्षात आले तर हा चित्रपट आम्ही थिएटर्समध्ये चालू देणार नाही. त्यामुळे भंसाळी यांनी चित्रपटाचे काम सुरू करण्याआधी राजपूत नेत्यांशी चर्चा करावी, अशी मागणीही हार्दिकने केली आहे.

दरम्यान, या चित्रपटाचे चित्रीकरण ऐतिहासिक चित्तोडगड किल्ल्यात होणार होते मात्र वाढत्या विरोधामुळे चित्रीकरण मुंबईत हलवण्यात आले आहे. मुंबईत चित्तौडगडाचा सेट उभारण्यात आला असून तिथेच चित्रीकरण होईल.

विरोध कशासाठी?

भंसाळी यांच्या पद्मावती चित्रपटात राणी पद्मिनी ही अलाउद्दीन खिलजीची प्रेयसी असल्याचे दाखवले जाणार असल्याची चर्चा आहे. तसे झाल्यास चित्तौडच्या आत्मसन्मानासाठी धगधगत्या कुंडात झोकून देणाऱ्या राणी पद्मिनीच्या शौर्याचा तो अपमान ठरेल. त्यामुळे लोकभावना दुखावल्या जातील, असे या चित्रपटाला विरोध करणाऱ्यांचे म्हणणे आहे.