मराठीसाठी स्वतंत्र सेट अप हवा!

अभिनय, दिग्दर्शन, लेखन केल्यानंतर सुबोध भावेनं सिनेनिर्मितीच्या दृष्टीनं आणखीन एक पाऊल पुढं टाकलंय. त्यानं स्वतःचा एडिटिंग स्टुडियो सुरु केलाय. 'हिंदीसाठी जसे यशराज, रामोजी, एनडी यांसारखे भव्य सेटअप्स आहेत तसे सगळ्या सोयीसुविधा पुरवणारे स्टुडियो सेटअप मलाही भविष्यात बनवायचे आहेत', असं तो सांगतो.
Mrinmayi.Natu@timesgroup.com
Tweet : @MrinmayiMT
मराठी सृष्टीला पुढं आकार देण्यात व्ही शांताराम, भालजी पेंढारकर आदी मराठी दिग्दर्शकांचा मोलाचा वाटा आहे. त्यांच्या स्टुडियोजमुळे आपले सिनेमे जगभर पोहोचले. मात्र आज शोकांतिका अशी आहे की मराठी सिनेमाला स्वतःचा हक्काचा असा स्टुडियो नाही. ही परिस्थिती बदलण्याचं स्वप्न सुबोध भावे बघत आहे.
सुबोधनं अलीकडेच एक सिनेमासाठी आणि एक मालिकेसाठी एडिटिंगचा सेटअप सुरु केलाय. याबद्दल तो सांगतो, 'सिनेमा बनवणं कला असली तरी त्यासाठीही पैसे हवेच असतात. माझं स्वप्न आहे की मराठी इंडस्ट्रीसाठी स्वतःचा एक स्वतंत्र स्टुडियो सेटअप असावा. आपल्या मराठी सिनेमांच्या निर्मितीसाठी हक्काचं असं ठिकाण असणं गरजेचं आहे. हिंदीसाठी जसे यशराज, रामोजी, नितीन देसाई यांसारखे भव्य सेटअप्स आहेत तसे सगळ्या सोयीसुविधा पुरवणारे स्टुडियो सेटअप मलाही भविष्यात बनवायचे आहे. त्यादृष्टीनं माझे हे एडिटिंग स्टुडियोज पहिलं पाऊल म्हणता येईल.' गेल्या काही वर्षात त्यानं इतर प्रादेशिक सिनेमांमध्ये काम केल्यानं तिथं त्यांना मिळणाऱ्या सोयी जवळून बघितल्या आहेत. दाक्षिणात्य सिनेमांप्रमाणे मराठीसाठीही त्याला अद्ययावत सुविधा असलेला स्टुडियो बनवायचा आहे. सध्या सुबोधनं त्याचा एडिटिंग स्टुडियो भाड्यानं दिला आहे. येत्या काळात येणाऱ्या मराठी मालिका आणि सिनेमांच्या पोस्टप्रोडक्शनचं काम इथं होणार असल्याचं समजतं.