सनी लिओनी अॅप करणार धमाका!

मटा ऑनलाइन वृत्त । मुंबई

बॉलिवूडच्या चंदेरी दुनियेत आपल्या हॉट अदांनी सगळ्यांना घायाळ करणारी अभिनेत्री सनी लिओनीचा चाहतावर्ग मोठा असून या चाहत्यांसाठी ती आता मोबाइल अॅप सुरू करत आहे. या अॅपमध्ये एक्सक्लूझिव कंटेटचा खजिना असेल, असं सांगून सनीने चाहत्यांची उत्कंठा वाढवली आहे.

सनी लिओनीने ट्विटरवर याबाबत माहिती दिली आहे. येत्या सहा दिवसांत हे अॅप सुरू होईल आणि त्याबाबत मला स्वत:लाही प्रचंड उत्सुकता असल्याचे सनीने सांगितले. सनीने या अॅपसाठी आपल्या चाहत्यांना खास आवाहन केलं आहे. 'सनी लिओनी अॅप' मोफत डाउनलोड करा...म्युजिक, व्हिडीओ आणि एक्सक्युजिव कंटेंट मिळवा आणि माझे जवळचे चाहते बना, असं सनीने अॅपच्या रजिस्ट्रेशनसाठी लाँच केलेल्या पेजवर नमूद केलं आहे.

दरम्यान, याआधीही सनी लिओनीने मोबाइल अॅप आणलं होतं. त्याला मोठा प्रतिसाद मिळाला होता. एका महिन्यात ३ लाख लोकांनी हे अॅप डाउनलोड केलं होतं. कमी वेळात जास्तीत जास्त लोकांनी एखादं अॅप डाउनलोड करण्याचा विक्रमही या अॅपने केला होता. आता सनीच्या नव्या कोऱ्या अॅपला कसा प्रतिसाद मिळतो, हे पाहावं लागणार आहे.