मुंबई टाइम्स टीम
इटलीमध्ये दणक्यात पार पडलेल्या दीपवीरचा लग्नसोहळ्याची चर्चा सध्या जोरात सुरू आहे. लग्नामध्ये व्हीआयपी वऱ्हाड्यांसाठी खास मराठमोळ्या पुरणपोळीचा बेत होता असं समजतं. सर्वांनी पुरणपोळीवर ताव मारत त्याच्या चवीची तारीफ केली म्हणे. त्यांच्या लग्नाचे फोटो काही मिनिटांतच सोशल मीडियावर व्हायरल झाले. दोन दिवसांपासून त्यांचे चाहते फोटोंची चातकाप्रमाणे वाट पाहत होते. अखेर सध्यांकाळी आठच्या सुमारास त्यांनी सोशल मीडियावर फोटो पोस्ट करताच नवदाम्पत्यावर शुभेच्छांचा वर्षाव झाला. अनेक बॉलिवूडकरांनी सोशल मीडियावर त्यांना भरभरुन शुभेच्छा दिल्या. कोंकणी आणि पारंपरिक सिंधी पद्धतीनं मोजक्याच कुटुंबियांच्या उपस्थितीत हा रंगतदार विवाहसोहळा पार पडला. त्याचीच काही खास क्षणचित्रं...
- जेवणाच्या मेन्यूमध्ये आवर्जून पुरणपोळीचा समावेश करण्यात आला होता. या शाही विवाह सोहळ्यात पारंपरिक कोंकणी पद्धतीनं जेवणाची प्रथा पार पडली. मुलीकडच्यांनी मुलाकडच्यांना आग्रहपूर्वक जेवायला वाढण्याची घालण्याची पद्धत आहे. ती यावेळीही झाली.
- त्यांचं लग्न इटलीमध्ये झालं असलं, तरी मुंबईतही त्याचं सेलिब्रेशन पाहायला मिळालं. नवरा मुलगा रणवीर सिंगच्या मुंबईतल्या घरी जोरदार रोषणाई करण्यात आली होती.
- रणवीरचे वडील जगजीत सिंग भवनानी यांनी देखील अनोख्या अंदाजात आपल्या सूनेचं भवनानी कुटुंबात स्वागत केलं. या दोघांचा गाजलेला चित्रपट 'बाजीराव- मस्तानी' चित्रपटातलं 'ये दीवानी मस्तानी हो गयी' हे गाणं थोड्या हटके अंदाजात गात जगजीत यांनी भवनानी कुटुंबात दीपिकाचं स्वागत केलं. 'ये दीवानी तो भवनानी हो गई' असं म्हणत त्यांनी जोडप्याला लग्नाच्या शुभेच्छा दिल्या असल्याचं कळतंय.
- अनुष्का-विराट आणि रणवीर-दीपिका या दोघांच्या लग्नाची तुलनाही झाली. सोशल मीडियावर त्यावरून चाहत्यांच्या चर्चा रंगल्या आहेत. दोन्ही कपलच्या लाइक्समध्ये खूप फरक असल्याचं बोललं जातंय.
तेवीस मिनिटांत दहा लाख लाइक्स
दीपिका-रणवीर या दोघांनीही संध्याकाळी आठच्या सुमारास त्यांचा फोटो सोशल मीडियावर पोस्ट केला होता. अवघ्या तेवीस मिनिटांमध्ये हा फोटो दहा लाख लोकांनी लाईक केला. त्यावर पन्नास हजारांहून अधिक लोकांनी कमेंट करून त्यांना शुभेच्छा दिल्या. तर चोवीस तासांमध्ये कोट्यवधी लोकांनी त्यांच्या फोटोला लाईक केलंय.