'ठाकरे' चरित्रपटात नवाझुद्दीन साकारणार बाळासाहेब

मुंबई: महाराष्ट्राच्या राजकारणावर आपला आगळा ठसा उमटवणारे शिवसेनाप्रमुख दिवंगत बाळासाहेब ठाकरे यांचा धगधगता जीवनपट लवकरच मोठ्या पडद्यावर जीवंत होणार आहे. 'ठाकरे' असे नाव असेलेल्या बाळासाहेबांच्या जीवनावर आधारित या चरित्रपटाच्या टीझरचे लाँचिंग आज मुंबईत एका दिमाखदार सोहळ्यात पार पडले. कसदार अभिनयासाठी प्रसिद्ध असलेला अभिनेता नवाझुद्दीन सिद्दिकी या चरित्रपटात बाळासाहेबांची भूमिका साकारत आहे.

टीझर लाँचिंगच्या या कार्यक्रमाला शिवसेना पक्षप्रमुख उद्धव ठाकरे यांच्यासह अभिनेते अमिताभ बच्चन आणि खासदार संजय राऊत उपस्थित होते.

या दिमाखदार कार्यक्रमाचे सूत्रसंचालन प्रसिद्ध अभिनेता सचिन खेडेकर याने केले. या कार्यक्रमात बाळासाहेबांची भूमिका साकारणारा अभिनेता नवाझुद्दीन सिद्दिकी उपस्थित राहू शकला नाही. मात्र त्याने व्हिडिओच्या माध्यमातून आपल्या भावना व्यक्त केल्या.

'आज 'ठाकरे' या चिरित्रपटाचा टिझर पाहिला, यावरून हे आजच सांगता येते की हा चित्रपट यशस्वी झाला आहे', असे म्हणत शिवसेना पक्षप्रमुख उद्धव ठाकरे यांनी, 'खासदार संजय राऊत यांना बाळासाहेब समजले होते. त्यांनी हे शिवधनुष्य पेलले आहे', अशा शब्दात राऊत यांचा या कार्यक्रमात गौरव केला.

शिवसेना नेते खासदार संजय राऊत यांनी या चित्रपटाची पटकथा लिहिली आहे. यावर त्यांनी तब्बल चार वर्षे काम केले आहे. चित्रपटाचे निर्मातेही राऊत हेच आहेत. अभिजीत पानसे या चित्रपटाचे दिग्दर्शन करत आहेत.

ठाकरे चरित्रपटचा टीझर पाहण्यासाठी येथे क्लिक करा...

खासदार संजय राऊत यांनी यापूर्वी 'बाळकडू' हा चित्रपट बनवला होता. मात्र, बाळकडू हा चरित्रपट नव्हता. या चित्रपटात बाळासाहेबांचा आवाज वापरण्यात आला होता. ठाकरे चित्रपटात मात्र शिवसेनाप्रमुख दिवंगत बाळासाहेब ठाकरे यांचा संपूर्ण जीवनपट उलगडणार आहे. या चरित्रपटाच्या माध्यमातून हे आव्हान कितपत पेलेले गेले आहे हे पाहण्यासाठी या चरित्रपटाच्या प्रदर्शनाची वाट पाहावी लागणार आहे.