'आई कुठे काय करते' सेटवरचा आगळावेगळा दसरा, मिलिंद गवळींनी शेअर केली खास गोष्ट

मुंबई: संयमी आणि संवेदनशील अभिनयकौशल्यानं अभिनेते मिलिंद गवळी यांनी प्रेक्षकांची मनं जिंकली आहेत. 'आई कुठे काय करते' या मालिकेतील त्यांच्या कामाचं भरभरून कौतुक होतंय. दसऱ्याच्या दिवशी मिलिंद यांनी एक खास बाब 'मुंटा'शी शेअर केलीय.

ते म्हणाले, 'माझ्या घरी दरवर्षी घटस्थापना होते. दसऱ्याला घट हलवून त्याचं शास्त्रोक्त पद्धतीनं विसर्जन केलं जातं. यंदा आम्ही 'आई कुठे काय करते'च्या सेटवरही घटस्थापना केली होती. नवरात्रीत खेळला जाणारा भोंडलाही आम्ही सेटवर खेळलो. घटस्थापनेच्या वेळी जी नऊ धान्य पेरली जातात; त्यातलं उरलेलं धान्य आमचा सेटिंग दादा राज पक्ष्यांना खाऊ घालतो.


हे फक्त नवरात्रीपुरतं नाही तर सेटवर शूटिंगसाठी आणलेल्या भाज्या, फळं, धान्य फेकून न देता ते पक्ष्यांना आणि प्राण्यांना दिलं जातं. आम्ही कलाकार मंडळीही यात सहभाग घेतो. मला वाटतं निसर्ग जपण्यासाठी टाकलेलं हे एक छोटं पाऊल आहे. त्यामुळे नावाप्रमाणेच आमचा सेट समृद्ध झाला आहे.'