आमच्या पप्पांनी गणपती आणला फेम चिमुकल्या साईराज केंद्रेची झीवरील लोकप्रिय मालिकेत एंट्री; प्रोमो व्हायरल

मुंबई- मालिका या प्रेक्षकांचा जिव्हाळ्याचा विषय. मालिकेत अनेक ट्विस्ट अँड टर्न येत असल्याने प्रेक्षक मालिकेत गुंतून राहतात. त्यातही मलिकेत काम करणारे बालकलाकार हे देखील अनेकदा प्रेक्षकांचं लक्ष वेधून घेताना दिसतात. त्यामुळे अनेक मालिकांमध्ये बालकलाकार दिसतात. आता झी मराठीवरील मालिकेत आता अशाच एका चिमुकल्याची एंट्री होणार आहे. 'आमच्या पप्पांनी गणपती आणला' हे गाणं मध्ये प्रचंड लोकप्रिय झालं होतं. या गाण्यातून साईराज केंद्रे हा घराघरात पोहोचला होता. आता साईराजची झी मराठीवरील 'अप्पी आमची कलेक्टर' या मालिकेत एंट्री होणार आहे. या मालिकेत तो अप्पीच्या मुलाची भूमिका साकारत आहे.

‘अप्पी आमची कलेक्टर’ ही मालिका आता उत्कंठावर्धक वळणावर आली आहे. कारण अप्पी आणि अर्जुन हे दोघंही वेगवेगळ्या वाटेवर निघायच्या तयारीत आहेत. कलेक्टर म्हणून उत्तराखंडला बदली झाल्याचं अप्पी अर्जुनला सांगते तेव्हा त्याच्यासमोर दोन पर्याय असतात. त्याचं काम सोडून, इथलं सगळं आयुष्य सोडून अप्पीसोबत उत्तराखंडला जाणं किंवा इकडंच राहणं. अप्पीनं आईबद्दल गोष्टी लपवल्यामुळे अर्जुन इकडेच राहायचा निर्णय घेतो. अप्पीपुढेही काही पर्याय नसल्याने ती उत्तराखंडला निघून जाते. अप्पी आणि अर्जुनच्या आयुष्यात या बदलीमुळे कोणतं वळण येणार? पुढे त्यांच्या आयुष्यात काय वाढून ठेवलंय? ते दोघं पुन्हा एकत्र येऊ शकतील का, या प्रश्नांची उत्तरं येत्या भागांमध्ये मिळणार आहेत. मात्र नुकताच या मालिकेचा एक प्रोमो व्हायरल झाला आहे.


या प्रोमोमध्ये मालिकेत काही वर्षांची लीप घेतली आहे. अप्पीला मुलगा झाला आहे. अप्पी आणि तिचा मुलगा हा उत्तराखंड येथील एका देवळात गेले आहेत. याचं देवळात अर्जुन देखील येणार आहे. अर्जुन आपल्याच मुलाला उचलून घेतो. मात्र त्याला तो त्याचा मुलगा असल्याचं सत्य मुळीच ठाऊक नाही. आता साईराजच्या येण्याने प्रेक्षकांनी आनंद व्यक्त केला आहे. मालिका आता कोणतं वळण घेणार हे पाहण्यासाठी प्रेक्षक उत्सुक आहेत.