कॉमेडिअन नाही…द एंटरटेनर!

कॉमेडी कलाकाराला अनेकदा लोक गांभीर्यानं घेत नाहीत. पण हे चुकीचं आहे असं कॉमेडी स्टार अली असगरला वाटतं. ‘कॉमेडीला कमी लेखणं चुकीचं आहे. कॉमेडिअन हा शब्द मला खूप छोटा वाटतो. त्याऐवजी त्यांना ‘द एंटरटेनर’ असं म्हणायला हवं’, असं त्यानं 'लीप सिंक बॅटल'च्या निमित्तानं मटाशी गप्पा मारताना सांगितलं.

कॉमेडी करताना कुणाचं मन दुखावलं जाणार नाही याचं भान विनोदी कलाकारांना कायम बाळगावं लागतं. निखळ मनोरंजन करणं सोपं नाही. ही खूप मोठी जबाबदारी असल्याचं कॉमेडी किंग अली असगर म्हणतो. 'द कपिल शर्मा शो' सोडल्यानंतर 'द ड्रामा कंपनी' आणि 'लिप सिंक बॅटल' या नवीन कॉमेडी शोजमध्ये तो झळकतोय.

वादापासून लांब!
माझं कपिलशी (शर्मा) शत्रुत्त्व आहे असं जर कुणी म्हणत असेल तर ते चुकीचं आहे. तो आजही माझा तितकाच जवळचा मित्र आहे. आजवरच्या कारकिर्दीत मी कधीच कुणाशीच भांडलो नाहीय. मुळात मला वाद आवडत नाहीत. वादांपासून कायम लांब राहण्याचा माझा प्रयत्न असतो.

त्रास झाला पण...
दादीच्या भूमिकेनं मला लोकप्रियता मिळवून दिली खरी. मात्र गेल्या काही महिन्यांपासून मी त्या भूमिकेबाबत खूश नव्हतो. याबद्दल मी वारंवार निर्मात्यांना सांगत होतो. मात्र मला शेवटपर्यंत उत्तर मिळालं नाही. माझ्यासोबत योग्य घडत नाहीय हे मला जाणवत होतं. अखेर अशी परिस्थिती निर्माण झाली की मी शो सोडण्याचा निर्णय घेतला. याचा खूप त्रास झाला पण वैयक्तिकदृष्ट्या मला समाधान वाटलं.

नशिबी स्त्रीपात्रच
कुठलंही चॅनेल असो, मला स्त्री पात्र हे साकारावंच लागतं. माझ्या नशिबी तेच दिसतंय. आता तर हा माझ्या आयुष्यातला अविभाज्य घटक बनलाय. नाव कमावायचं असेल तर हे करावंच लागेल असं दिसतंय.

जुनं ते सोनं
सगळ्यांविषयी आदर असला तरी आजकाल परफॉर्मन्सेस असतातच कुठं? नवीन सिनेमे हे केवळ तंत्रज्ञांसाठी उपयुक्त असे म्हणता येतील. त्याउलट अभिनयाच्याबाबतीत 'पुराने चावल' हे कधीही अव्वल. विशेषतः ब्लॅक अँड व्हाईटच्या काळातील कलाकारांची जादू काही औरच होती. जुनं ते सोनं उगाच म्हणत नाहीत.

मराठीत यायचंय
फार कमी लोकांना माहित असेल की साधारण दहा वर्षांपूर्वी मी 'मन पाखरू'नावाच्या सिनेमाची निर्मिती केली होती. मात्र तो नीट प्रदर्शित होऊ शकला नाही. मुळात माझ्या जवळचं सगळं वर्तुळ हे मराठी लोकांचं आहे. त्यामुळे त्यांचे सगळे सिनेमे मी बघतो. स्वप्नील जोशी मला लहान भावासारखा तर राकेश सारंग माझ्या मोठ्या भावासारखे आहेत. सचिन पिळगावकर यांना तर मी वडील मानतो.

दिग्दर्शन-निर्मितीला वेळ आहे!
इच्छा असली तरी दिग्दर्शन किंवा परत निर्मिती करण्यासाठी मला अजून वेळ आहे. सध्या तरी मी हातात असलेल्या कामावर लक्ष केंद्रित करतोय. तोंडावर मेकअप लावा किंवा सिनेमा बनवा यातलं एकच काहीतरी करावं या मताचा मी आहे.