क्राइम ठरतोय प्राइम

गुन्हेगारी जगत, वेगवेगळ्या प्रकारचे गुन्हे, त्यांचा तपास हे क्राइम विश्व मनोरंजनसृष्टीसाठी मात्र प्राइम ठरतंय. गुन्हेगारी, न्यायालयं यावर आधारित चित्रपट, मालिका, वेबसीरिज यांना प्रेक्षकांचा भरभरुन प्रतिसाद मिळताना दिसतोय.

मुंबई टाइम्स टीम
गुन्हेगारी जगतातल्या बादशाहचं जीवन, वेगवेगळ्या प्रकारचे गुन्हे, गुन्ह्यांचा तपास, पोलीस, न्यायालयं, खटले यातलं काहीही घ्या...मनोरंजनविश्वात हे चालतेच. यावर आधारित चित्रपट असोत, मालिका असोत वा वेबसीरिज...प्रत्येकाला प्रेक्षकांची पसंती मिळते. हे सिनेमे बॉक्स ऑफिसवर हिट ठरतात. यावर आधारित मालिका चांगला टीआरपी खेचतात, तर वेबसीरिजना चांगले व्ह्यूज मिळतात. याबाबत नुकत्याच करण्यात आलेल्या एका सर्वेक्षणातून ही बाब दिसून आली.

गुन्हे, त्यामागची मानसिकता, त्यात सहभागी असलेल्या व्यक्ती, त्यामागची कारणं याविषयी लोकांना नेहमीच उत्सुकता असते. त्यामुळे टीव्हीवर आलेले क्राइम शोज प्रेक्षकांची पसंती मिळवतात. या शोमुळे गुन्हेगारांची कार्यपद्धती कळू शकते आणि त्यानुसार काळजी घेणं शक्य होतं असं काही प्रेक्षकांचं म्हणणं आहे. सर्वेक्षणात या गोष्टीवर भर देण्यात आला आहे. न्यायालयात चालणारे खटले, वकीलांचे युक्तिवाद, पोलिसांकडून होणारा तपास हे पाहायलाही प्रेक्षकांना आवडतं. न्याय मिळायला वेळ लागतो, पण अखेर विजय सत्याचाच विजय होतो हे पाहायला लोकांना आवडतं. लेखणीतून हे सारं जग उतरवण्यासाठी लेखकांनाही संधी मिळते. त्यामुळे एकूणच गुन्हेगारी विश्व छोट्या किंवा मोठ्या पडद्यावर मांडलं जातंय.

काय सांगते आकडेवारी?
० बॉलिवूड चित्रपटांमध्ये दाखवण्यात येणाऱ्या गुन्ह्यात ३७ टक्के गुन्हे हे चकमकींतून झाले असल्याचं दाखवण्यात आलं आहे. २० टक्के गुन्हे हत्यांशी संबंधित, ११ टक्के गुन्हे अपहरणाशी संबंधित, ९ टक्के बलात्काराशाी संबंधित, ५ टक्के चोरीच्या घटना आणि इतर १८ टक्के गुन्हे हे विविध कारणांमुळे झाले असल्याचे दाखवण्यात आलं आहे.
० चित्रपटात दाखवण्यात येणाऱ्या न्यायव्यवस्थेमधले ३२ टक्के कर्मचारी हे अकार्यक्षम असल्याचं दाखवण्यात आलंय. केवळ १० टक्के कर्मचारी प्रामाणिक असल्याचं, १६ टक्के कर्मचारी भ्रष्ट, २६ टक्के कर्मचारी आळशी तर १६ टक्के कर्मचारी दंडेलशाही करणारे असल्याचं दाखवण्यात आलं आहे.
० मालिकांमध्ये न्यायव्यवस्थेतले ७१ टक्के कर्मचारी हे अकार्यक्षम असल्याचं तर २९ टक्के कर्मचारी कार्यक्षम असल्याचं दाखवण्यात आलं आहे.
० चित्रपटांमधील ४५ टक्के पात्रांचा न्यायव्यवस्थेवर विश्वास असल्याचं दाखवण्यात आलंय. तर मालिकांतील फक्त २५ टक्के पात्रांचा विश्वास न्यायव्यवस्थेवर आहे असं दाखवण्यात आलं आहे.