शार्पशूटर

जास्त करून सुरक्षेसाठी वापरल्या जाणाऱ्या ड्रोन्सचा वापर आता शूटिंगमध्येही मोठ्या प्रमाणावर केला जाऊ लागलाय. उंचावरुन शूटिंग करण्यासाठी वापरल्या जाणाऱ्या या कॅमेऱ्याने हिंदी-मराठी मालिकांमध्ये अगदी बारकाईने चित्तथरारक दृश्यं चित्रीत केली जात आहेत…

शूटिंगसाठी वापरल्या जाणाऱ्या तंत्रज्ञानामध्ये दिवसेंदिवस बदल होत आहेत. उंचावरुन दृश्यं चित्रित करण्यासाठी ड्रोन कॅमेऱ्यांचा वापर मोठ्या प्रमाणावर होऊ लागला असून, त्यामुळे प्रेक्षकांना काही वेगळी, ‘एरियल व्ह्यू’ दृश्यं टीव्ही मालिकांमध्ये पाहायलामिळताहेत. अनेक हिंदी-मराठी मालिकांमध्ये याचा वापर होत असून, ‘रात्रीस खेळ चाले’, ‘नकुशी’, ‘गोठ’, ‘चाहूल’ या मराठी मालिका ही यातली ठळक उदाहरणं.

ड्रोन कॅमेराचा वापर करून शूट केलेले ‘चाहूल’ मालिकेचे प्रोमोज हिट ठरले. हे वाइड अँगलचे सीन्स लोकांना आवडले. हे कसे शूट करण्यात आले याबाबत प्रेक्षकांमध्ये चर्चा रंगली होती. ड्रोनच्या वापरानं मालिकेबद्दलची आणि कथानकामध्ये काय पाहायला मिळेल याबद्दलची उत्सुकता अजूनच वाढते. या कॅमेराचं वैशिष्ट्य म्हणजे याचा आवाका खूप मोठा असतो. सगळ्यात महत्त्वाचं म्हणजे, एरियल व्ह्यू (आकाशातून) शॉट्स घेण्यासाठी तो उपयोगी पडतो असं दिग्दर्शक सांगतात.

प्रकार आणि भाडं
० ड्रोन हा ग्रे मार्केटमधून विकत घेता येऊ शकतो. मात्र हा प्रकार बेकायदेशीर असल्यानं त्याचं पक्कं बिल मिळत नाही.
० डिजेआय एस१००० सगळ्यात मोठा आणि महागडा ड्रोन. चौदा लाखांचा हा ड्रोन दिवसाला ५०हजार रुपये भाडं देऊन मिळू शकतो.
० इन्स्पायर १ आणि २ या ड्रोनचे लेन्स बदलता येऊ शकतात. तो भाड्यानं घेण्यासाठी दिवसाला अंदाजे २५ हजार रुपये मोजावे लागतील.
० फँटम ४ हा स्वस्तात मस्त असा ड्रोन दिवसाला १५ हजार भाडं देऊन वापरला जातो.

कसा काम करतो?
० फोर के रिझोल्युशनमध्ये व्हिडीओ शूट करणारा हा कॅमेरा प्रत्येक चेहरा अतिशय स्पष्ट दाखवतो.
० १५ ते २० मिनिटांच्या आपल्या फ्लाईट टाइममध्ये हा ड्रोन २ किमी अंतराच्या परिसर शूट करू शकतो.
० ५०० मीटर उंचीवर उडवता येऊ शकतो.
० विमानाप्रमाणे यामध्ये ऑटोपायलटचा पर्यायही उपलब्ध आहे.
० ड्रोनमधील स्प्रेडिंग विंग्स टेक्नोलॉजीमुळे ड्रोन टेक ऑफ घेताच पाय वर उचलून घेतो, ज्यामुळे याचा कॅमेरा ३६० अंशांमध्ये सहज फिरू लागतो.
० लाईट ब्रिज टेक्नोलॉजीमुळे ड्रोन नेमकं काय शूट करतोय हे मोबाइलवर सहज बघता येतं.

सिनेमे, मालिका, लग्न समारंभ, रिअल इस्टेट, कॉर्पोरेट शूट्समध्ये अनेकदा एरियल व्ह्यू दाखवायचा असल्यानं ड्रोन वापरला जातो. त्यासाठी लाइन प्रोड्यूसर्सना पोलिसांकडून रीतसर परवानगी घ्यावी लागते. भारतात हा ट्रेंड हळुहळू ट्रेंड वाढत चालला आहे. ड्रोनचा वापर करताना शूटिंग करण्याआधी सगळ्या नियमांची नीट पूर्तता करुन घेण्यात महिनाभर तरी लागतो.
अभिजीत पारुई, ड्रोन ऑपरेटर

ड्रोनचा वापर केल्यानं नेहमी नवनवीन लोकेशन्सवर शूटिंग करणं शक्य होतं. रंगसंगती आणि पार्श्वभूमी अशा गोष्टी अधिक उठून दिसतात. आकाशातून खाली काही किलोमीटर्सचा व्ह्यू दिसत असल्यामुळे दृश्य अधिक प्रभावी होतं. आम्ही भवानीपूर आणि भोरच्या दरीत शूट केलेली दृश्यं प्रेक्षकांना आवडली. गेल्या वर्षीपासून ड्रोनच्या वापराचा हा ट्रेंड सुरू झाला असून या वर्षात त्याचं प्रमाण आणखी वाढेल. केवळ आऊटडोअर शूटसाठी नव्हे, तर निरनिराळ्या कोनातून चित्रीकरण करण्यासाठी ड्रोन्सचा इनडोअर शूटमध्येही वापर करण्यात येईल.
- आरव जिंदाल, निर्माता, (चाहूल)

वैशिष्ट्य
० सिनेनिर्मिती ते थ्रीडी जिओमॅपिंग अशा विविध कामांमध्ये ड्रोन वापरला जातो.
० वापरण्यास सोपा असल्याने कोणीही तो सहज वापरू शकतं. सरावाची फार गरज नाही.