वय २८; भूमिका पन्नाशीची

मुंबई टाइम्स टीम
या आठवड्यात सुरू झालेल्या 'त्रिदेवियां' या मालिकेत ध्रुवी हळदणकर हा नवीन चेहरा दिसतोय. अभिनेत्री म्हणून छोट्या पडद्यावर तिची नव्यानं एंट्री झाली आहे. मूळची ध्रुवी पत्रकार होती. एकेकाळी न्यूज चॅनलमध्ये काम करणारी ही तरुणी आता या मालिकांमध्ये अभिनय करण्याकडे वळाली आहे. त्यातही तिला भूमिका आली आहे ती पन्नाशीच्या बाईंची. याबद्दल ध्रुवी सांगते, ‘याआधी मी अँकर आणि रेडियो जॉकी म्हणून काम करत होते. पण मनाच्या कुठल्या तरी कोपऱ्यात अभिनेत्री बनण्याचं स्वप्न उराशी बाळगलं होतं. अगदी वयाच्या तिसऱ्या वर्षांपासून! आणि आता अखेर योग्य वेळ अखेर आली असल्यानं मी माझी स्वप्नं पूर्ण करते आहे'. तिच्या भूमिकेचीही वेगळी गंमत आहे. खरं तर ध्रुवीचं २८ वर्षं आहे. पण, मालिकेत ती चक्क सुहासिनी चौहान नावाच्या पन्नाशीतल्या बाईची भूमिका साकारते आहे. यासाठी निरीक्षण, तालीम आदी अनेक गोष्टींकडे ती लक्ष देते आहे. 'मी परफॉर्मर आहे. लोकांचं मनोरंजन करणं हेच माझं काम आहे. त्यामुळे जोपर्यंत मी वेगळं काम करतेय तोवर भूमिकेचं वय महत्त्वाचं नाही' असं ती सांगते. अभिनयक्षेत्र नवीन असल्यानं रोज सेटवर वेगवेगळ्या आव्हानांना सामोरं जावं लागत असल्याचं ध्रुवी नमूद करतेय.
असा मोठा ब्रेक मिळण्यापूर्वी तिने अनेक छोट्या छोट्या भूमिका साकारल्या आहेत. यात आवर्जून उल्लेख करायला हवा तो सावधान इंडिया, बालवीर, क्राइम पेट्रोल यांचा. या तिच्या कामाची दखल घेऊनच तिला नवी संधी मिळाली, असं म्हणायला हरकत नाही. अस्सल मराठीमोळी असलेल्या या अभिनेत्री अद्याप मराठीमध्ये मात्र फार झेप घेतलेली नाही.