लांबलेले तास अन् कपिलची माफी!

Soumitra.pote@timesgroup.com

टीव्हीवर तुफान लोकप्रिय असलेल्या ‘द कपिल शर्मा शो’मध्ये प्रेक्षक म्हणून जाण्यासाठीही लोक आतुर असतात. सर्वसाधारणपणे या शोसाठी येणाऱ्या प्रेक्षकाला संध्याकाळी साडेसहाला स्टुडिओत सोडलं जातं आणि रात्री १२ पर्यंत याचं शूट संपतं. पण नुकत्याच झालेला एका शोचं शूटिंग मात्र त्याला अपवाद ठरलं. यावेळी कपिल वारंवार प्रेक्षकांची माफी मागत होता...

‘चार साहिबजादेः द राइज ऑफ बंदा सिंग बहादर’ची टीम अलीकडेच कपिलच्या शोमध्ये येणार होती. कपिलच्या शोसाठी स्टुडिओत सोडताना प्रेक्षकांना त्यांचे मोबाइल, चीजवस्तू अशा सगळ्या वस्तू लॉकरमध्ये ठेवायला सांगितलं जातं. कोणताही खाऊ नेऊ दिला जात नाही. त्या दिवशी नेहमीप्रमाणे संध्याकाळी साडेसहा वाजता प्रेक्षक आता शिरले. हे शूट साधारण बारा वाजता संपेल अशा सूचना आत शिरतानाच प्रेक्षकांना देण्यात आल्या. आत गेल्यानंतर सगळी टीम सज्ज होती. कपिलही स्टेजवर आला. टाळ्यांचा कडकडाट झाला. पण शो सुरू होण्यापूर्वी स्टुडिओमधल्या कॅमेऱ्यांच्या कनेक्शनबाबत तांत्रिक अडचण उभी राहिली. पाहता पाहता साडेसात झाले.. आठ वाजले. पण शूट सुरू होईना.

आलेल्या प्रेक्षकांपैकी काहींनी आरडाओरडा सुरू केला. मग कपिल तडक स्टेजवर आला. त्याने प्रेक्षकांची थेट माफी मागितली आणि कार्यक्रम लवकरच सुरू होईल असंही सांगितलं. आठचे नऊ झाले. साडेनऊ वाजता मात्र चुळबुळ वाढली. उपस्थितांपैकी काही कॉलेजच्या विद्यार्थ्यांची दुसऱ्या दिवशी परीक्षा असल्यामुळे या मुलांना बाहेर सोडण्यात आलं. काहींनी आरडाओरडाही सुरू केला. प्रेक्षक अस्वस्थ असताना या सगळ्या प्रकारात कपिल सतत स्टेजवर होता. तो वारंवार प्रेक्षकांची माफी मागत होता.

स्टेजवरचा बँड प्रेक्षकांचं मनोरंजन करायचा.. त्यावेळी एखादं गाणं गाऊन कपिलही त्यांना साथ करत होता. या शोला उपस्थिती होती, बेळगावकर असलेल्या मिहीका, शिल्पा आणि मनोज मायकल यांची. ‘साडेसहाला आम्ही आत गेलो. तांत्रिक कारणाने गोंधळ झाला खरंच आहे. परंतु, कपिल सतत प्रेक्षकांसोबत होता. खरं तर त्याला व्हॅनिटी व्हॅनमध्ये जाऊन बसता आलं असतं. आराम करता आला असता. पण तो पुनःपुन्हा स्टेजवर यायचा. माफी मागायचा. त्याचं बँडवाल्यांना गाण्यातून साथ करणं चालू होतं. त्यातल्या त्यात तो आमचं मनोरंजन करण्याचा प्रयत्न करत होता.’

शूट सुरू असताना अधेमध्ये तो प्रेक्षकांपैकी प्रत्येकाला भेटला. उशीर झाल्याबद्दल दिलगिरी व्यक्त करणंही सतत चालूच होतं. अखेर सगळं शूट संपलं. संध्याकाळी सहाच्या सुमारास आत गेलेलं पब्लिक हुश्श म्हणत, स्टुडिओतून आपल्या चीजवस्तू घेऊन बाहेर पडलं. तेव्हा वाजले होते, दुसऱ्या दिवशी पहाटेचे साडेपाच!