पुरुषच बघतात जास्त टीव्ही!

टीव्ही बघण्यात कोण पुढे असतं, तर स्त्रियाच…असा तुमचा समज असेल तर जरा थांबा. स्त्रियांच्या तुलनेत पुरुषच जास्त वेळ टीव्हीसमोर ठाण मांडून बसतात. हे आमचं नाही, तर बार्कचं म्हणणं आहे.

प्राइमटाइममध्ये टीव्हीची व्ह्यूअरशिप कशी असते, ग्रामीण भागातला व्ह्यूअरशिप पॅटर्न कसा आहे, वेगवेगळ्या विभागांनुसार व्ह्यूअरशिप कशी बदलत जाते अशा अनेक मुद्द्यांवर खूप रंजक माहिती पुढे आली आहे. बार्कने (ब्रॉडकास्ट ऑडियन्स रिसर्च कौन्सिल इंडिया) ग्रामीण भारतातल्या व्ह्यूअरशिपचा अभ्यास करून त्याबाबतचा सविस्तर तपशील त्यांच्या वर्षाअखेरीस प्रसिद्ध केलेल्या बातमीपत्रामध्ये दिला आहे. त्यातून समोर आलेले काही ठळक मुद्दे…

० ग्रामीण भागातले व्ह्यूअरशिप पॅटर्न्स
- आठवड्याचा ट्रेंड
ग्रामीण आणि शहरी भागात दिवसा टीव्ही बघण्याचे वेगवेगळे पॅटर्न्स आहेत. शहरांच्या तुलनेत ग्रामीण भागातला दिवस फार लवकर, म्हणजे साधारणतः सकाळी ५ वाजल्यापासून सुरू होतो. त्यामुळे सकाळी ९ पर्यंत ग्रामीण प्रेक्षकांची संख्या खूप जास्त असते. त्यानंतर मात्र दुपार आणि संध्याकाळ या दोन्ही वेळेस शहरी प्रेक्षकांची संख्या सर्वाधिक असते. गावांमध्ये सगळ्यात जास्त टीव्ही हा रात्री ८.३० ते ९ या वेळेत बघितला जातो. गावातले लोक लवकर झोपत असल्यानं रात्री १०.३०नंतर प्रेक्षकांची संख्या रोडावते.

- आठवड्यातले दिवस विरुद्ध वीकेंड व्ह्यूअरशिप
आठवड्याअखेरीस प्रेक्षकांकडे निवांत वेळ असल्याने अर्थातच इतर दिवसांच्या तुलनेत यावेळी सर्वाधिक व्ह्यूअरशिप मिळते.
- प्राइम टाइम विरुद्ध नॉन प्राइम टाइम व्ह्यूअरशिप
सरासरी विचार करता नॉन प्राइम टाइमच्या तुलनेत प्राइम टाइमला गावांमध्ये दुप्पट व्ह्यूअरशिप मिळते.

० प्राइम टाइममध्ये व्ह्यूअरशिपचा फरक
- सर्वाधिक टीव्ही बघणाऱ्यांमध्ये १५-३० मधल्या प्रेक्षकांचा वयोगट मोडतो.
- महिलांच्या तुलनेत टीव्ही बघणाऱ्या पुरुष प्रेक्षकांची संख्या जास्त आहे.
- प्राइम टाइममध्ये खाद्यपदार्थ, पेय, केसांशी संबंधित उत्पादनं, स्वच्छता या प्रकारच्या जाहिराती अधिक असतात.

० विभागानुसार पडणारा फरक
उत्तर, दक्षिण, पूर्व, पश्चिम या चार विभागांचा विचार करता दक्षिणेतल्या ग्रामीण भागामध्ये टीव्ही जास्त पाहिला जातो.

० कुठले कार्यक्रम
गावांमध्ये मालिकांना जास्त पसंती मिळते. त्यानंतर सिनेमांसंबंधी कार्यक्रम बघितले जातात. या दोन्हीनंतर बातम्या, खेळ, संगीत, लाईफस्टाइल यासारख्या कायक्रमांना पसंती मिळते.