ब्राह्मण अभिनेत्रीच का? दिग्दर्शक सुजय डहाकेवर कलाकारांचा निशाणा

मुंबई: राष्ट्रीय पुरस्कार विजेता दिग्दर्शक सुजय डहाके यानं केलेल्या वक्तव्याची मराठी सिनेसृष्टीत जोरदार चर्चा असून अनेक कलाकारांनी सुजयच्या वक्तव्यावर प्रतिक्रिया दिल्या आहेत. मराठी मालिकांमध्ये प्रमुख भूमिकेत ब्राह्मण अभिनेत्रीच का असते? असं वक्तव्य सुजयनं एका मुलाखतीदरम्यान केलं होतं. सुजयच्या या वक्तव्यावर अनेक कलाकारांनी प्रतिक्रिया देत सुजयच्या वक्तव्याचा निषेध केला आहे.

'अनेक मराठी वाहिन्या आहेत, त्यावर सुरू असलेल्या मालिकांमध्ये प्रमुख अभिनेत्री ही ब्राह्मणच असते', असं वक्तव्य सुजयनं केलं होतं. 'एक व्हाईट कॉलर क्लास आहे तो याला कंट्रोल करतोय आणि आपल्याला मराठी चित्रपटसृष्टी किती छान चाललीये असं वाटतं,' असं तो बोलताना म्हणाला होता. इतकंच नाही तर आपल्या २३ व्या वर्षी राष्ट्रीय पुरस्कार मिळाल्याचा काहींना राग आहे, असंही त्यानं या मुलाखतीत म्हटलं होतं.

‘तुझ्यात जीव रंगला’मध्ये पाठकबाईंच्या भूमिकेत अक्षया देवधर, ‘माझ्या नवऱ्याची बायको’तील अभिनेत्री अनिता दाते, सायली संजीव, ऋता दुर्गुळे अशा अभिनेत्रींची नावं घेत सुजयनं मराठी मालिका विश्वातील तथाकथित जातीवादी वास्तव अधोरेखित करण्याचा प्रयत्न केला होता.

सुजयनं केलेल्या या वक्तव्यामुळं मराठी सिनेसृष्टीत अनेक कलाकारांनी सोशल मीडियावर व्यक्त होत मत मांडलं आहे. अग्गबाई सासुबाई मालिकेतील शुभ्रा म्हणजेच तेजश्री प्रधान हिनं एक फेसबुकवर पोस्ट शेअर केली आहे.' मी ब्राह्मण नाहीये बरं! सीकेपी आहे. पण गेली अनेक वर्ष माझ्याकडं काम आहे. याला टॅलेंट म्हणूया का?', असं तिनं या पोस्टमध्ये म्हटलं आहे.

भाऊ कदम @ ५०; दणक्यात साजरा झाला वाढदिवस!

अभिनेता शशांक केतकर यानं देखील फेसबुकवर भलीमोठी पोस्ट करत सुजयवर निशाणा साधला आहे. 'माटेगावकर तुझी अभिनेत्री, बापट तुझी लेखिका, देवधर तुझा अभिनेता, जोशी तुझा संगीत दिग्दर्शक आणि तू कसले बिन बुडाचे आरोप करतोस रे. आपल्या क्षेत्रात फक्त टॅलेंटला जागा आहे. कृपा करून हे असले स्टंट करू नकोस. त्या पेक्षा तुझ्या कामावर लक्ष दे जमल्यास. साने आणि मंजुळे हे कॉम्बिनेशन पुरेस नाहीये का तुला तुझ्या प्रश्नाचं उत्तर द्यायला? असो ..... कांबळे, छल्लारे आणि पवार यांच्या दिग्दर्शनाखाली हा केतकर रोज काम करतो आणि याचा मला अभिमान आहे. तू कोणत्या जाती धर्माचा आहेस याचा तसूभरही विचार डोक्यात न आणता तुझं कल्याणच होऊदे, तुझे चित्रपट चालुदे हीच इच्छा आहे', असं शशांकनं त्याच्या पोस्टमध्ये म्हटलं आहे.

_{करोनाचा धसका; मराठी सेलिब्रिटींची होळी रद्द}