वाजला…तो फसला!

Mrinmayi.Natu@timesgroup.com
Tweet : @MrinmayiMT

मोबाइल वाजला रे वाजला की…‘बरा सापडला’ असं म्हणत सेटवर जल्लोष होतो. कारण ज्याचा फोन वाजतो त्याने अख्ख्या टीमला पार्टी द्यायची असते. अनेक टीव्ही मालिकांच्या सेटवर असा अलिखित नियमच बनवण्यात आला आहे…

'अँड अॅक्शन'.. सेटवर असा 'शाऊट' दिला गेला अन् तेवढ्यात खुद्द कॅमेरामनच्या मोबाइलची रिंग वाजू लागली. मग काय, सेटवर दोन मिनिटांसाठी शांतता आणि नंतर लगेचच सेटवर जल्लोष झाला. तुम्ही म्हणाल असं का? तर कॅमेरामननं मोबाइलबंदीचा अलिखित नियम मोडल्यानं सगळ्यांना आइसक्रीमची पार्टी मिळाली. 'चिडीया घर' या मालिकेच्या सेटवरचा हा किस्सा. फक्त याच नाही तर अनेक हिंदी-मराठी मराठी मालिकांच्या सेटवर शिस्त पाळण्यासाठी असे तिखट-गोड नियम बनवण्यात आले आहेत.

मोबाइल फोन आज मस्ट झाला असला तरी त्याच्या अतिवापरामुळे कामावरुन लक्ष विचलित होतं. म्हणूनच बहुतांश मालिकांच्या सेटवर मोबाइल फोनच्या वापरावर बंदी घालण्यात आली असून, शक्यतो फोन सायलेंटवर असणं अपेक्षित असतं. तंत्रज्ञांपासून कालाकारांपर्यंत हा नियम पाळलाही जातो. पण कुणाचा फोन वाजला रे वाजला की त्या व्यक्तीला संपूर्ण कास्ट आणि क्रूला पार्टी द्यावी लागते. सेटवरील नियम मोडल्याचा हा अलिखित दंड समजला जातो. अँड टीव्हीवरच्या 'तेरे बिन' आणि स्टार प्रवाहवरील 'पुढचं पाऊल' आणि 'लेक माझी लाडकी' या मालिकांच्या सेटवर त्यासाठी आइसक्रीम पार्टीचा नियम ठेवण्यात आलाय. 'गणपती बाप्पा मोरया'च्या सेटवर कधी खाऊ आणला जातो तर कधी शीतपेय पाजून लोकांना थंड केलं जातं.

दंडातून समाजकार्य
काही मालिकांच्या सेट्सवर दंड म्हणून आकारण्यात येणारी रक्कम काही चांगल्या सामाजिक उपक्रमासाठी बाजूला ठेवण्यात येते. 'बहू हमारी रजनीकांत'च्या सेटवर कुणाचाही फोन वाजल्यास त्या व्यक्तीकडून पैसे घेतले जातात. प्रोडक्शनवाले त्या पैशांतून फिल्मसिटीच्या आसपास राहणाऱ्या गरीबांना एक वेळचं जेवण देतात. स्टार प्लसवरील नवीन 'नामकरण'च्या सेटवरही दंड म्हणून शंभर रुपये गोळा करण्यात येतात. विशिष्ट रक्कम जमा झाल्यावर हे पैसे एका सामाजिक संस्थेला मदत म्हणून देण्यात येतात.