लकी चार्म

नकुल मेहता हे नाव घराघरात ओळखीचं झालं आहे. रिअॅलिटी शोजमधील हा होस्ट आणि दोस्त अनेक तरुणींना आवडतो. त्यातच सध्या तो ‘इश्कबाज’ या मालिकेत साकारत असलेल्या शिवाय सिंग ओबेरॉय या भूमिकेची तर खूप चर्चा आहे. आज टीव्हीवरील लोकप्रिय स्टार्समध्ये नकुलची गणना होते. त्याच्या या यशामागचं रहस्य काय असं विचारल्यावर त्यानं ‘जानकी, माझी बायको’ असं उत्तर दिलंय.
ऑनस्क्रीन संगीत सोहळ्यासाठी तो चक्क बायकोनं दिलेला एक लकी चार्म घालणार आहे. मालिकेत लग्नाचा ट्रॅक सुरू झाल्यानं तो खूप उत्सुक आहे. यानिमित्ताने नकुलला त्याच्या खऱ्या लग्नातल्या एकेक गोष्टी आठवू लागल्या आहेत. प्रसिद्ध गायिका जानकीशी चार वर्षांपूर्वी तो विवाहबद्ध झाला आहे. इंडस्ट्रीतल्या सगळ्यात देखण्या जोडप्यांमध्ये त्यांचा समावेश होतो. अशावेळी ऑनस्क्रीन लग्नासाठी तो स्वतःचं घड्याळ घालणार आहे म्हणे. याबद्दल नकुल सांगतो, 'हे घड्याळ मला जानकीनं लग्नाच्या वाढदिवशी गिफ्ट केल्यानं खूप खास आहे. आता मी पडद्यावर साकारत असलेली भूमिका आयुष्याच्या नवीन वळणावर असल्यानं त्यात माझ्या खऱ्या आयुष्यातला लकी चार्म घालून मी ती साकारु इच्छितो.’ मालिकेतलं हे भव्य लग्न टिपिकल पंजाबी पद्धतीनं होणार असून नकुलला एखाद्या राजकुमाराप्रमाणे सजवण्यात येणार असल्याचं समजतंय.