मराठीत जीव गुंतला

मराठीची गोडी काही अमराठी, इतकंच नव्हे तर परदेशी कलाकारांनाही लागली आहे. मराठी मनोरंजनसृष्टीत आलेल्या आणि मराठीचा गोडवा चाखलेल्या अशाच काही कलाकारांनी त्यांचे अनुभव ‘मुंटा’ला सांगितलं.

उखाण्यांच्या प्रेमात

मराठी मालिकेला परदेशी चेहरा हवा असल्याचं समजल्यानं मी ‘चाहूल’साठी ऑडिशन्स दिल्या. तीनदा झालेल्या ऑडिशन्सनंतर माझी निवड झाली. यानिमित्त पहिल्यांदाच मराठी मालिकेत रशियन अभिनेत्री मुख्य भूमिकेत दिसतेय. सुरुवातीला मला मराठी भाषेविषयी फारशी कल्पना नव्हती. मात्र आता हळुहळू त्याविषयी जाणून घेत मी मराठी भाषा आणि इथल्या संस्कृतीच्या प्रेमात पडले आहे. मालिकेत मी बहुतांश इंग्रजीत बोलले असले, तरी सेटवर मी थोडं थोडं मराठी शिकत गेले. यात नमस्कार, धन्यवाद, या बसा, चहा असे शब्द शिकत गेले. पण खरी गंमत झाली होती ती उखाणा घेताना. नंतर ते प्रोमोमध्येही दाखवण्यात आलं. मराठी उखाण्यांच्या मी प्रेमात पडले आहे. सेटवर इतरांना मराठीमध्ये बोलताना मी ऐकायचे. म्हणून आता मीही मराठीमध्ये बोलण्याचा प्रयत्न करतेय.
- लिझान, रशियन अभिनेत्री

आत्मविश्वास मिळाला

मी मूळचा राजस्थानचा आहे. माझ्या आईचं शिक्षण मुंबईत झाल्याने अनेक मराठी कुटुंबांशी तिची ओळख आहे. त्यामुळे सुरुवातीपासूनच मला मराठी समजत होतं. अभिनयात करिअर करायचं म्हटल्यावर मी अनेक मराठी कलाकारांची कामं अभ्यास म्हणून बघितली होती. ज्यांचं काम बघून मी भारावलो होतो, त्या मोहन जोशी यांच्यासोबतच माझी पहिली मराठी मालिका करतोय. माझा पहिला सीनही जोशी यांच्याबरोबरच होता. त्यांच्यासमोर बोलायची हिंमतही झाली नव्हती. पण आता आत्मविश्वास आला आहे. मी बऱ्यापैकी मराठीत संवाद साधू शकतो. इन्स्टाग्रामवर माझ्या फॉलोअर्सची संख्या थेट ५५ हजारांपर्यंत गेली आहे. मराठी मंडळींनी माझ्यावर केलेलं प्रेम पाहून थक्क व्हायला होतं.
- ऋषी सक्सेना, अभिनेता

पुण्याने आपलंसं केलं

मी मूळची कॅनेडिअन. साधारण पाच वर्षांपूर्वी मी भारतात आले. पुण्यात राहण्यामुळे माझी मराठी भाषेशी ओळख झाली. रिक्षावाल्याशी किंवा भाजी घेतानाही मी मराठीतच बोलते. मला मराठी शिकवण्यात सारंग साठ्ये याचा मोठा वाटा आहे. आज एखादी मराठी कलाकृती बघून मी जेव्हा ‘ती हृदयस्पर्शी होती’ असं म्हणते तेव्हा समोरच्याचा चेहरा बघण्यासारखा होतो. ‘पिंडदान’ हा माझा पहिला मराठी सिनेमा. संपूर्ण कॅनडामध्ये जितके चित्रपट बनवले जातात त्यापेक्षा जास्तच मराठीत बनत असतील. इथली सिनेइंडस्ट्री इतकी छान काम करतेय हे बघून मला वेबविश्वातही मराठीचा ठसा उमटायला हवं असं वाटत होतं. म्हणून आम्ही भारतीय डिजिटल पार्टीची स्थापना केली. जगभरातल्या मराठी तरुणाईपर्यंत पोहोचण्याचा हा आमचा प्रयत्न आहे.
- पॉला मॅकगिलीन, अभिनेत्री-निर्माती