लिटिल ‘सरप्राइज’

प्रथमेश राणे, आरएडीएव्ही कॉलेज

यंदाची दिवाळी काही सोसायट्यांमधल्या बच्चेकंपनीनं फटाक्यांशिवाय, पर्यावरणस्नेही पद्धतीनं साजरी केली. पनवेलमधल्या अशाच एका सोसायटीतल्या छोट्या दोस्तांचं कौतुक करण्यासाठी लिटिल चॅम्प प्रथमेश लघाटे अचानक तिथे पोहोचला. मुलांसाठीही ते सुखद सरप्राइज ठरलं.

फटाक्यांमुळे होणाऱ्या प्रदूषणाबाबत दिवसेंदिवस जागरुकता वाढत चालली आहे. अनेक घरांमधल्या मुलांनी यंदा स्वतःहून फटाक्यांशिवाय दिवाळी साजरी केली. पनवेलच्या गिरीराज सोसायटीमध्येही बच्चे कंपनीनं अशीच दिवाळी साजरी केली. आणि त्यांचं कौतुक करण्यासाठी अचानक तिथे पोहोचला लिटिल चॅम्प गायक प्रथमेश लघाटे. प्रथमेशच्या हातून या सोसायटीतल्या मुलांना खाऊ आणि भेटवस्तू देण्यात आल्या. तसंच त्यानं या छोट्या दोस्तांचं कौतुक करत त्यांच्याशी गप्पाही मारल्या.

नवीन पनवेलमधील गिरीराज सोसायटीत राहणाऱ्या दीपा पेंडसे यांनी यंदा पुढाकार घेत दिवाळीमध्ये फटाके न फोडण्याचं आवाहन रहिवाशांना केलं. सर्वांनी त्यांना उत्तम प्रतिसाद ‌दिला. सोसायटीतल्या बच्चेकंपनीनंही फटाके न वाजवण्याचा निर्णय घेतला. याबद्दल दिपा पेंडसे यांनी मुंटाला सांगितलं, की 'दिवाळीत फटाके फोडता येणार नाही हे कळल्यावर लहान मुलं नाराज होतील याची कल्पना होती. परंतु जी मुलं आई-बाबांकडे फटाक्यांचा आग्रह धरणार नाहीत त्यांना माझ्याकडून दिवाळीचा खाऊ आणि गिफ्ट मिळतील असं सांगितलं. बच्चेकंपनीनंही याला साथ देत फटाकेविरहीत दिवाळी साजरी करण्याचं ठरवलं.' रविवारी या मुलांना खाऊ आणि गिफ्ट दिली जाणार होती.

पेंडसे यांची प्रथमेशशी ओळख आहे. रविवारी त्यांनी प्रथमेशला सहज फोन केला असता बोलताना त्यांनी त्याला या उपक्रमाबाबत सांगितलं. त्यावेळी प्रथमेश बोरिवलीतला दिवाळी पहाटचा कार्यक्रम संपवून पुण्याला निघाला होता. या उपक्रमाबद्दल कळताच प्रथमेशनं गिरीराज सोसायटीला भेट द्यायचं ठरवलं आणि तो तिथे दाखल झाला. त्याच्या येण्यानं सोसायटीच्या मुलांना खूप आनंद झाला. प्रथमेशनं या मुलांशी गप्पा मारत त्यांचं कौतुक केलं.

महेश पेंडसे यांनी सांगितलं, की 'बोरिवलीतला कार्यक्रम संपवून प्रथमेश पुण्याकडे निघाला होता. योगायोगाने आमचं फोनवर बोलणं झालं. या उपक्रमाबद्दल समजताच त्यानं आवर्जून पनवेलला येत आमच्या सोसायटीला भेट दिली. स्वतः या उपक्रमात सहभागी होऊन छोट्या दोस्तांना भेटवस्तू, खाऊ वाटला. प्रथमेशच्या या अचानक भेटीमुळे बच्चेकंपनीही खूश झाली होती.'

मी दिवाळी पहाटच्या कार्यक्रमानिमित्त बोरिवलीत आलो होतो. पुण्याकडे परत निघालो असताना पेंडसे काकींचा मला फोन आला. बोलता-बोलता त्यांच्या या उपक्रमाबद्दल कळलं. मी स्वतःही गेली काही वर्ष दिवाळीला फटाके फोडत नाही. त्यामुळे या छोट्या दोस्तांचं मला कौतुक वाटलं. मग मीही त्यांच्या या कौतुक सोहळ्यात सहभागी झालो.

- प्रथमेश लघाटे, गायक