मुंबई : गाण्यांचा रिअॅलिटी शो 'संगीत सम्राट' हा कार्यक्रम आपल्या पहिल्याच पर्वात भरपूर लोकप्रिय झाला. आता संगीत सम्राटचे दुसरे पर्व लवकरच प्रेक्षकांच्या भेटीला येत आहे.
कार्यक्रम कधीपासून सुरु होणार हे अद्यापतरी सांगण्यात आलेलं नाही. हा कार्यक्रम डान्स रिअॅलिटी शो 'डान्स महाराष्ट्र डान्स'ची जागा घेईल, अशी शक्यता वर्तवण्यात येत आहे. संगीत सम्राट या कार्यक्रमाचे बहुतांश स्पर्धक हे किशोरवयीन असल्याने हा कार्यक्रम तरुण वर्गात खूप लोकप्रिय आहे.
गायक आदर्श शिंदे या शोच्या परीक्षकांपैकी एक असतील. दुसरे परीक्षक आणि शोच्या सूत्रसंचालकाचे नाव अजून गुलदस्त्यातच ठेवण्यात आले आहे. संगीत सम्राटचा पहिला प्रोमो आला आहे ज्यात आदर्श शिंदे आपल्या गायकीची एक झलक दाखवताना दिसतात. 'देवा तुझ्या गाभाऱ्याला उंबराच नाही' या गाण्याच्या काही ओळी ते गुणगणताना दिसतात. तसेच महाष्ट्रातील वेगवेगळ्या शहरात होणाऱ्या ऑडिशन्सच्या तारखेची घोषणा आदर्श करतात. 'इथं जे वाजतं... तेच गाजतं' अशी या शोची टॅगलाइन आहे.