टप्पूसेनेकडून घेतोय धडे!

नवीन टप्पू म्हणजेच राज अनडकटनं 'तारक मेहता का उलटा चष्मा'च्या सेटवर सगळ्यांची मनं जिंकायला सुरूवात केली आहे. विशेष म्हणजे टप्पूसेनेकडूनच आपल्याला खूप शिकायला मिळतंय असं तो म्हणतो.

'राज, नाम तो सुना ही होगा' असं म्हणत नवीन टप्पू म्हणजेच राज अनडकटनं 'तारक मेहता का उलटा चष्मा'च्या सेटवर सगळ्यांची मनं जिंकायला सुरूवात केली आहे. विशेष म्हणजे टप्पूसेनेकडूनच आपल्याला खूप शिकायला मिळतंय असं तो म्हणतो. ही भूमिका मिळायच्या आधी त्याच्या अनेक ऑडिशन्स आणि मॉक शूट्स घेण्यात आल्या होत्या. 'ऑडिशन देताना मला माहित नव्हतं की ती टपूसाठी आहे. आता आता माझ्या नावाची चक्क फॅन पेजेस बनली आहेत. प्रेक्षक इतक्या लवकर स्वीकार करतील असं स्वप्नातही वाटलं नव्हतं', या शब्दांत त्यानं आनंद व्यक्त केला.

सेटवरील अनुभवाबद्दल राज सांगतो, 'ही भूमिका साकारताना मी जरा साशंक होतो. पण दिग्दर्शक सरांनी मला खूप मदत केली. तसंच दादाजी म्हणजेच अमित (भट) सर यांच्याकडून वेळोवेळी ‘असं नाही असं कर, इथं आवाज कमी कर किंवा हाय टोन ठेव’ असं मार्गदर्शन मला मिळतंय. दिलीपजी (जोशी) असो वा दिशाजी (वाकानी) तसंच संपूर्ण टप्पूसेनेकडूनही मला नवीन गोष्टी शिकायला मिळत आहे'.

भव्य गांधीला रिप्लेस केल्यानं अर्थातच त्याला शूटच्या पहिल्या दिवशी दडपण आलं होतं. पण सगळ्यांनी छान सांभाळून घेतल्याचं राज आवर्जून सांगतो. तुलना होण्याची भीती मनात होती. शिवाय नवीन टप्पू साकारणं एक प्रकारचं आव्हान असल्याचं तो कबूल करतो. अशावेळी आधीचा टप्पू म्हणजेच भव्य गांधीकडून टिप्स घेतल्या का असं राजला विचारल्यावर, 'मी अजून तरी त्याच्याशी बोललो नाहीय. मात्र आधीपासून ही मालिका बघत असल्यानं आता टप्पू साकारताना मजा येतेय'.

राज १९ वर्षांचा असून, मालाडच्या नागिनदास खांडवाला कॉलेजमध्ये बीएमएमला शिकतोय. सध्या त्याची परीक्षा सुरू आहे. याबद्दल राज सांगतो, 'शूटिंग आणि अभ्यास दोन्ही मॅनेज करावं लागतं. मी सेटवर पुस्तकं घेऊन जातो. दोन शॉट्समध्ये वेळ मिळाला की परीक्षेची तयारी करतो'. त्याला अभिनयासह एडिटिंग आणि व्हीएफएक्स या क्षेत्रात करिअर करायचंय.

कुत्र्यांकडून स्वागत

तारक..च्या सेटच्या जवळपास खूप भटके कुत्रे आहेत. शूटिंगच्या पहिल्या दिवशी त्यांनी भुंकूनभुंकून राजचं स्वागत केल्याचं तो गमतीत सांगतो. 'मी सेटवर आलो आणि सगळे कुत्रे एकदम माझ्यावर भुंकायला लागले. मी एकदम घाबरलो. अर्थात आता त्यांनाही माझी सवय व्हायला लागलीय', असं तो गमतीत म्हणतो.