'तारक मेहता का उल्टा चश्मा' आता तेलुगूत

मटा ऑनलाइन वृत्त । मुंबई

सब टीव्हीवर प्रसारित होणारी 'तारक मेहता का उल्टा चश्मा' ही लोकप्रिय मालिका आता तेलुगू भाषेतही दिसणार आहे. 'तारक माम्मा अय्यो रामा' असं या मालिकेचं तेलुगूतील नाव असून २६ जून रोजी ई टीव्ही प्लस इंडिया वाहिनीवर तिचा पहिला भाग प्रसारित झाला. दररोज संध्याकाळी साडेसात वाजता ही मालिका प्रेक्षकांना पाहता येणार आहे.

'तारक मेहता का...'च्या या भाषिक सीमोल्लंघनाबद्दल मालिकेचे निर्माते आसित मोदी यांनी आनंद व्यक्त केला. आमची ही मालिका संपूर्ण उत्तर, पूर्व आणि पश्चिम भारतातील प्रेक्षकांची सर्वात आवडती मालिका आहे. एवढंच नव्हे तर भारताबाहेर असलेले भारतीय आणि अन्य देशातील काही प्रेक्षकही आवर्जून ही मालिका बघतात. हलक्या फुलक्या विनोदातून हसवणारी ही मालिका पाहताना लोक स्वत:च्या चिंता विसरून जातात. आता तेलुगुच्या माध्यमातून आम्ही दक्षिण भारतीय प्रेक्षकांपर्यंत पोहोचणार आहोत. तिथंही ही मालिका हिंदीइतकीच लोकप्रिय होईल,' असा विश्वास त्यांनी व्यक्त केला.