अभिनेते सुरेश चटवाल यांचे निधन

मटा ऑनलाइन वृत्त । मुंबई

हिंदी मालिका आणि चित्रपटांमधील ज्येष्ठ अभिनेते सुरेश चटवाल यांचे मुंबईमध्ये दीर्घ आजाराने निधन झाले. सध्या ते सब टीव्हीवरील एफआयआर मालिकेतील पोलीस कमिशनरच्या भूमिकेमुळे घराघरांत पोहोचले होते.

सुरेश यांचे पुत्र यमन यांनी काल रात्री उशिरा वडिलांच्या निधनाबाबत माहिती दिली. शनिवारी रात्री चटवाल यांची प्राणज्योत मालवली आणि काल त्यांच्यावर मुंबईत अंत्यसंस्कार करण्यात आले.

१९६९मध्ये ‘राखी राखी’ या सिनेमामधून आपल्या चित्रपट कारकीर्दीला सुरुवात करणाऱ्या सुरेश चटवाल यांनी ३०हून अधिक हिंदी सिनेमांमधून लहान; पण लक्षात राहणाऱ्या भूमिका साकारल्या. 'करण अर्जून', 'कोयला' आणि 'मुन्नाभाई एमबीबीएस'मधील त्यांच्या भूमिका खास लक्षात राहिल्या. २०१०मध्ये प्रदर्शित झालेला ‘नक्षत्र’ हा त्यांचा शेवटचा सिनेमा ठरला. अभिनयाची उत्तम जाण असलेला आणि दिलेली भूमिका ताकदीने पडद्यावर सादर करणारा अभिनेता अशी त्यांची ओळख होती.