वीकेंडला होम थिएटर हाऊसफुल्ल

वीकेंडला टीव्हीवर लोक काय बघत असतील? सास-बहू मालिका, खेळ, बातम्या की सिनेमे? होय, वीकेंडला टीव्हीसमोर बसून सर्वाधिक लोक सिनेमे पाहणं पसंत करतात.

भारतासारख्या बॉलिवूडप्रेमी देशात एकूण टेलिव्हिजन व्ह्यूअरशिपमध्ये सिनेमे बघण्याचं प्रमाण २८ टक्के आहे. वीकेंड्सना, सार्वजनिक सुट्टीच्या दिवशी तर हे प्रमाण आणखी वाढतं. ब्रॉडकास्ट ऑडियन्स रिसर्च कौन्सिल इंडियाच्या (बार्क) 'डिकोडिंग मुव्हीज ऑन टेलिव्हिजन' या न्यूजलेटरमधून भारतीय प्रेक्षकांचा इडियट बॉक्सवर सिनेमे बघण्याकडे किती कल आहे हे जाणून घेण्याचा प्रयत्न करण्यात आलाय. कुठला प्रेक्षकवर्ग नेमका कधी टीव्हीवर सिनेमे बघणं पसंत करतो यासारख्या गोष्टींबाबत सविस्तर माहिती देण्यात आली आहे. त्यातील काही मुद्दे खास मुंटाच्या वाचकांसाठी...

० कोण बघतं सिनेमे जास्त?
देशभरातल्या आकडेवारीचा अंदाज घेता, २२-४० वयोगटातले प्रेक्षक टीव्हीवर सिनेमे बघणं पसंत करतात. त्यातही साधारण १५-३० वयोगटातल्या तरुणांचा समावेश सगळ्यात जास्त आहे. पुरुषांच्या तुलनेत महिला मात्र भक्तीभावात्मक आशयात अधिक रमताना दिसतात हे विशेष.

केवळ सिनेमा दाखवणाऱ्या चॅनेल्सना सर्वाधिक, म्हणजेच ६०% व्ह्यूअरशिप आहे. त्यानंतर जीइसी म्हणजेच स्टार प्लस, झी, सोनी या जनरल एंटरटेनमेंट चॅनेल्सवर दाखवल्या जाणाऱ्या सिनेमांना १३% व्ह्यूअरशिप आहे. विशेष म्हणजे प्रादेशिक चॅनेल्सवर लहान मुलांसाठीच्या सिनेमांना जास्त मागणी असल्याची बाब समोर येते. वीकेंड्सना टीव्हीवर सर्वाधिक सिनेमेच बघितले जातात. तसंच सार्वजनिक सुट्टीच्या दिवशी याचं प्रमाण सर्वाधिक असतं. बार्कच्या आकडेवारीनुसार, गेल्या वर्षी स्वातंत्र्यदिन, दसरा, गणेश चतुर्थी, संक्रांत या काही ठराविक सणांना लोकांनी घरी बसून टीव्हीवर सगळ्यात जास्त सिनेमे बघितले. त्यातच लोकप्रिय सिनेमे आणि वर्ल्ड टेलिव्हिजन प्रीमिअर्समुळे या आकडेवारीत नेहमीच वाढ होताना दिसते.

० डबचा दबदबा
हिंदी भाषक मार्केट्समध्ये, विविध भाषांतल्या सिनेमांचे हिंदीत डब केलेले सिनेमे बघण्याचं प्रमाण जास्त आहे. देशभरातून महाराष्ट्र/गोवामध्ये सर्वाधिक म्हणजेच २१% हिंदी सिनेमे तर २४% हिंदीत डब केलेले सिनेमे बघितले जातात. एकूण ट्रेंड बघता, टीव्हीवर बघितल्या जाणाऱ्या डब आशयाला उत्तर आणि दक्षिण भारताच्या तुलनेत पूर्व आणि पश्चिम भागांत जास्त व्ह्यूअरशिप मिळताना दिसते.