'योग योगेश्वर जय शंकर'मध्ये होणार भस्मे काका आणि महाराजांची भेट; हा अभिनेता साकारणार भूमिका

मुंबई- छोट्या पडद्यावरील मालिका या प्रेक्षकांच्या अत्यंत आवडीच्या असतात. त्यात भक्ताला आपल्या देवाशी जोडणाऱ्या मालिका या प्रेक्षकांना विशेष पसंत पडतात. कलर्स मराठी वाहिनीवरील 'योग्य योगेश्वर जय शंकर' ही मालिका देखील प्रेक्षकांमध्ये प्रचंड लोकप्रिय आहे. समाजाला भक्तीची योग्य दिशा दाखवणारे शंकर महाराज आणि त्यांच्या भक्तांसोबत घडणारी किमया पाहून प्रेक्षकही तल्लीन होतात. नुकताच या मालिकेत मोठा ट्विस्ट आला आहे. मालिकेत लवकरच शंकर महाराजांची आणि त्यांचे परम भक्त ओंकारनाथ भस्मे काका यांची भेट होणार आहे. महाराजांना प्रिय असणाऱ्या भक्तांपैकी एक असणारे भस्मे काका आपल्या देवाची भेट घेणार आहेत. अभिनेता विश्वनाथ कुलकर्णी मालिकेत भस्मे काकांची भूमिका साकारताना दिसणार आहे.
कोण होते भस्मे काका
शंकर महाराजांच्या नवरत्न दरबारामधील एक असणारे भस्मे काका हे एक क्रांतिकारक होते. भारताला स्वातंत्र्य मिळवून देण्याच्या सशस्त्र लढ्यात ते सहभागी होते. क्रांतिकारक ओंकारनाथ भस्मे यांनी भारताच्या स्वातंत्र्यलढयात आपलं योगदान दिलं आहे. त्यासोबतच त्यांनी सोलापुरात राहून महाराजांची सेवादेखील केली आहे. कित्येक वर्ष महाराजांच्या सानिध्यात राहण्याची आणि त्यांची सेवा करण्याची संधी त्यांना मिळाली. भस्मे महाराजांना प्रवासात नेहमी पाठीवर किंवा खांद्यावर घेऊन जात असत. त्यामुळेच तुळजाभवानी आईच्या दर्शनाला जाताना महाराजांनी काकांच्या डोक्यावर पाय ठेवले आणि महाराजांच्या पाऊलखुणा त्यांच्या डोक्यावर उमटल्या. शंकर महाराजांच्या गुरु अध्यायात भस्मे काकांचा उल्लेख आढळतो.


ही भूमिका म्हणजे जबाबदारी
योग योगेश्वर जय शंकर मालिकेत अभिनेता विश्वनाथ कुलकर्णी ह्याची ओंकारनाथ भस्मे काका ह्या व्यक्तिरेखेत एंट्री झाली आहे. आता लवकरच महाराजांची आणि त्यांची भेट होणार आहे. या आगळ्यावेगळ्या भूमिकेबद्दल बोलताना विश्वनाथ म्हणाला, 'मला जेव्हा ही भूमिका मिळाली तेव्हा मीदेखील त्यांच्याबद्दल माहिती मिळवली. त्याच्या आधारावर सध्या मी ही भूमिका साकारण्याचा प्रयत्न करतोय. महाराज आणि भस्मे काका यांचं नातं आणखी चांगल्या पद्धतीने लोकांपर्यंत कसं पोहोचवता येईल असा माझा प्रयत्न असेल. मी आजवर इतक्या सिरीयल केल्या पण क्रांतिकारक ही भूमिका मी पहिल्यांदाच करतोय. ती एक जबाबदारी आहे पण मनस्वी त्याचा आनंददेखील आहे.' विश्वनाथ यापूर्वी 'माई' या वेबसीरिजमध्येही झळकला आहे. सोबतच तो सन मराठीवरील 'आपली माणसं' या मालिकेतही भूमिका करत आहे.

अरुंधती जोगळेकर नव्हे केळकर; माप ओलांडून करणार नव्या घरात गृहप्रवेश